وزیر اعظم مودی ہفتہ کو تین ریاستوں کے دورے پر جائیں گے

Story by  PTI | Posted by  [email protected] | Date 20-11-2026
وزیر اعظم مودی ہفتہ کو تین ریاستوں کے دورے پر جائیں گے
وزیر اعظم مودی ہفتہ کو تین ریاستوں کے دورے پر جائیں گے

 



نئی دہلی: وزیر اعظم نریندر مودی ہفتہ، 21 نومبر کو مغربی بنگال، بہار اور اتر پردیش کا دورہ کریں گے۔ اس دوران وہ انڈین انسٹی ٹیوٹ آف ٹیکنالوجی (آئی آئی ٹی) کھڑگپور کے پلاٹینم جوبلی (75 سالہ) جشن میں شرکت کریں گے، بہار کے ویشالی میں تقریباً 34,470 کروڑ روپے کے ترقیاتی منصوبوں کا افتتاح اور سنگ بنیاد رکھیں گے، جبکہ لکھنؤ میں ’کوشل دیکشانت سماروہ‘ (ہنرمندی کی تربیت سے متعلق تقریب) میں بھی شرکت کریں گے۔ ایک سرکاری بیان کے مطابق وزیر اعظم سب سے پہلے مغربی بنگال جائیں گے، جہاں وہ آئی آئی ٹی کھڑگپور کے قیام کے 75 سال مکمل ہونے کے موقع پر منعقدہ تقریب میں شرکت کریں گے۔

بیان میں کہا گیا ہے کہ مودی آئی آئی ٹی کھڑگپور کے 75 طلبہ سے بات چیت بھی کریں گے، جو ادارے کے 75 سالہ سفر کی علامت ہوگی۔ آئی آئی ٹی کھڑگپور کا قیام 1951 میں عمل میں آیا تھا۔ یہ ملک کا پہلا آئی آئی ٹی ادارہ ہے۔ قومی اہمیت کے ادارے کی حیثیت سے آئی آئی ٹی کھڑگپور نے ہندوستان میں تکنیکی تعلیم، تحقیق اور اختراع کے فروغ میں نمایاں کردار ادا کیا ہے۔ سرکاری بیان کے مطابق وزیر اعظم مغربی بنگال سے بہار کے ویشالی پہنچیں گے، جہاں وہ تقریباً 34,470 کروڑ روپے کے ترقیاتی منصوبوں کا افتتاح اور سنگ بنیاد رکھیں گے۔ ان منصوبوں کا تعلق سڑکوں کے رابطے، توانائی، شہری بنیادی ڈھانچے، آبی وسائل، تعلیم، صحت، ٹرانسپورٹ اور دیگر اہم شعبوں سے ہے۔

ان کا مقصد پوری ریاست میں بنیادی ڈھانچے کو مضبوط بنانے اور عوامی خدمات کو بہتر بنانا ہے۔ بیان کے مطابق مودی تقریباً 4,280 کروڑ روپے کی لاگت سے دریائے گنگا پر تعمیر کیے گئے ’نتیش سیتو‘ کو قوم کے نام وقف کریں گے۔ 19.7 کلومیٹر طویل یہ پل پٹنہ ضلع میں قومی شاہراہ 22 پر واقع کچی درگاہ کو ویشالی ضلع میں قومی شاہراہ 322 پر واقع بیدوپور سے جوڑتا ہے۔

اس میں 9.7 کلومیٹر طویل مرکزی پل اور 10 کلومیٹر طویل رابطہ سڑکیں شامل ہیں۔ بہار کے دورے کے بعد وزیر اعظم اتر پردیش کے دارالحکومت لکھنؤ جائیں گے، جہاں وہ گومتی نگر کے اندرا گاندھی پرتشٹھان میں پانچویں ’کوشل دیکشانت سماروہ‘ میں شرکت کریں گے۔ تعلیمی سیشن 2021-22 میں شروع کیا گیا ’کوشل دیکشانت سماروہ‘ ہنرمندی کے فروغ کے شعبے میں نمایاں کارکردگی کا مظاہرہ کرنے والوں کی حوصلہ افزائی اور تربیت مکمل کرنے والے نوجوانوں کے عملی میدان میں قدم رکھنے کی خوشی میں منعقد کیا جانے والا سالانہ قومی پروگرام ہے۔

بیان میں کہا گیا ہے کہ اس سال منعقد ہونے والی تقریب میں صنعتی تربیتی اداروں (آئی ٹی آئی)، قومی ہنرمندی تربیتی اداروں (این ایس ٹی آئی) اور انسٹرکٹر ٹریننگ انسٹی ٹیوٹس (آئی ٹی او ٹی) کے 52 ہونہار طلبہ کو ان کی غیر معمولی کارکردگی کے لیے اعزاز سے نوازا جائے گا۔ وزیر اعظم نریندر مودی نے سوشل میڈیا پلیٹ فارم ’ایکس‘ پر ایک پوسٹ میں کہا، ’’کل 21 نومبر کو میں مغربی بنگال، بہار اور اتر پردیش میں کئی پروگراموں میں شرکت کروں گا۔ ان میں مغربی بنگال میں آئی آئی ٹی کھڑگپور کا پلاٹینم جوبلی جشن، بہار کے ویشالی میں 34 ہزار کروڑ روپے سے زیادہ کے اہم ترقیاتی منصوبوں کا افتتاح اور سنگ بنیاد، اور اتر پردیش کے دارالحکومت لکھنؤ میں ہنرمندی کے فروغ سے متعلق اہم پروگرام ’کوشل دیکشانت سماروہ‘ شامل ہیں۔‘‘