نئی دہلی: صدر جمہوریہ دروپدی مرمو نے جمعرات کو اوڈیشہ کے رائرنگ پور میں ’آپریشن درشتی‘ کے تحت خصوصی طبی سہولتیں فراہم کرنے پر مسلح افواج کی طبی خدمات کی ستائش کی۔ مرمو نے ’ایکس‘ پر ایک پوسٹ میں کہا کہ ملک بھر کے ان علاقوں میں جہاں طبی سہولتیں محدود ہیں، معیاری طبی خدمات پہنچانے کی یہ پہل انسانی خدمت کے تئیں مسلح افواج کی طبی خدمات کے غیر متزلزل عزم اور عوام کو بہتر صحت کی سہولتیں فراہم کرنے کے پختہ ارادے کی عکاسی کرتی ہے۔

مسلح افواج کی طبی خدمات نے 2 سے 4 نومبر کے درمیان ’آپریشن درشتی‘ کے 12ویں مرحلے کا کامیابی سے انعقاد کیا۔ اس دوران رائرنگ پور میں ایک بڑے کثیر التخصصی طبی کیمپ کا انعقاد کیا گیا، جہاں 4,000 سے زیادہ مریضوں کا علاج کیا گیا اور 365 افراد کی بینائی بحال کرنے سے متعلق سرجری کی گئی۔

اس کیمپ میں ماہر ڈاکٹروں کی جانب سے جامع طبی خدمات مکمل طور پر مفت فراہم کی گئیں، جس سے علاقے کے لوگوں کو بہتر طبی سہولتیں حاصل ہو سکیں۔ مایور بھنج ضلع کے رائرنگ پور سے تعلق رکھنے والی صدر جمہوریہ نے کہا، ’’میں اوڈیشہ کے رائرنگ پور میں ’آپریشن درشتی‘ (ایک بڑے کثیر التخصصی طبی کیمپ) کے کامیاب انعقاد پر مسلح افواج کی طبی خدمات کی تہہ دل سے ستائش کرتی ہوں۔ مجھے بتایا گیا ہے کہ اس کیمپ میں بڑی تعداد میں مریضوں کا علاج کیا گیا اور بینائی بحال کرنے سے متعلق کئی سرجری کی گئیں۔‘‘