نئی دہلی: انفورسمنٹ ڈائریکٹوریٹ (ای ڈی) نے جون میں رانچی میں راشٹریہ سویم سیوک سنگھ (آر ایس ایس) کے دفتر پر ہوئے پٹرول بم حملے سے متعلق منی لانڈرنگ کی تحقیقات کے سلسلے میں جمعرات کو چار ریاستوں میں چھاپے مارے۔ حکام نے یہ اطلاع دی۔

حکام کے مطابق پاکستان میں قائم ممنوعہ دہشت گرد تنظیم شہزاد بھٹی نیٹ ورک (ایس بی این) تحقیقاتی ایجنسیوں کے نشانے پر ہے۔ اس معاملے میں نیشنل انویسٹی گیشن ایجنسی (این آئی اے) کے بعد ای ڈی دوسری مرکزی ایجنسی ہے جو اس گروہ کی تحقیقات کر رہی ہے۔ وزارت داخلہ نے 16 ستمبر کو ایس بی این کو غیر قانونی سرگرمیاں (روک تھام) ایکٹ (یو اے پی اے) کے تحت دہشت گرد تنظیم قرار دیا تھا۔

ای ڈی حکام نے بتایا کہ دہلی، بہار، جھارکھنڈ اور کرناٹک میں واقع مختلف مقامات پر انسدادِ منی لانڈرنگ قانون (پی ایم ایل اے) کے تحت چھاپے مارے گئے۔ آر ایس ایس کے عہدیداروں نے الزام لگایا تھا کہ 17 جون کی دوپہر رانچی کے نِوارن پور علاقے میں واقع اس کے دفتر پر پٹرول بم پھینکے گئے تھے۔

اس کے بعد جھارکھنڈ پولیس نے تین افراد کو گرفتار کیا تھا۔ بدھ کو جاری وزارت داخلہ کے گزٹ نوٹیفکیشن میں یو اے پی اے کی دفعہ 35(1)(اے) کے تحت شہزاد بھٹی نیٹ ورک کو قانون کی پہلی فہرست میں شامل کیا گیا۔ اس فہرست میں ممنوعہ دہشت گرد تنظیموں کے نام شامل ہیں۔ مرکزی حکومت کا کہنا ہے کہ ایس بی این ہندوستان میں دہشت گردی کے مختلف واقعات میں ملوث رہا ہے اور اسی بنیاد پر اس کے خلاف یہ کارروائی کی گئی ہے۔