نئی دہلی: پولیس ذرائع کے مطابق چیف الیکشن کمشنر گیانیش کمار کے خلاف 2 اکتوبر کو جنتر منتر پر ہونے والے مجوزہ احتجاج کے لیے دہلی پولیس نے اب تک اجازت نہیں دی ہے۔ سماجی کارکنوں اور طلبہ تنظیموں نے الیکشن کمیشن کے کام کاج اور ووٹر لسٹ کی خصوصی گہری نظرثانی یعنی ایس آئی آر سے متعلق مسائل کو لے کر اس احتجاج کا اعلان کیا ہے۔ پولیس ذرائع کے مطابق جنتر منتر پر مجوزہ اجتماع کے لیے ابھی اجازت نہیں دی گئی ہے۔ یہ احتجاج گاندھی جینتی کے موقع پر ہونا ہے اور منتظمین چیف الیکشن کمشنر گیانیش کمار کے خلاف کارروائی کا مطالبہ کر رہے ہیں۔

احتجاج کے اعلان کے درمیان دہلی پولیس نے جنتر منتر کی جانب جانے والی سڑکوں پر بیریکیڈ بھی لگا دیے ہیں۔ عام آدمی پارٹی کی دہلی یونٹ کے صدر سوربھ بھاردواج نے پیر کو لوگوں سے جنتر منتر پر ہونے والے احتجاج میں شامل ہونے کی اپیل کی تھی۔ امکان ہے کہ دیگر اپوزیشن گروپ بھی اس احتجاج میں شامل ہو سکتے ہیں یا الگ سے احتجاج کر سکتے ہیں۔ دریں اثنا، ’کاکروچ جنتا پارٹی‘ (سی جے پی) تحریک کے بانی ابھیجیت دپکے نے 2 اکتوبر کو شام 4 بجے ممبئی کے شیواجی پارک میں اسی نوعیت کی ’جیل بھرو تحریک‘ شروع کرنے کا اعلان کیا ہے۔

دپکے نے اس سے پہلے کہا تھا کہ ممبئی پولیس نے گیانیش کمار کے خلاف سی جے پی کے 2 اکتوبر کے مجوزہ احتجاج کی اجازت دینے سے انکار کر دیا ہے۔ اس کے بعد انہوں نے گاندھی جینتی کے موقع پر ’جیل بھرو تحریک‘ شروع کرنے کا اعلان کیا۔ تاہم ممبئی پولیس نے واضح کیا کہ بمبئی ہائی کورٹ کے 2013 کے حکم کے پیش نظر اسے شیواجی پارک میں اجتماع کی اجازت دینے کا اختیار نہیں ہے اور یہ علاقہ ’سائلنس زون‘ ہے۔ پولیس نے کہا کہ درخواست گزار اجنکیا شندے کو ممبئی میں کسی دوسری جگہ کا انتخاب کرکے وہاں احتجاج کی اجازت طلب کرنے کا مشورہ دیا گیا ہے۔

پولیس کے مطابق ایسی نئی درخواست پر مناسب طریقے سے غور کیا جائے گا۔ سی جے پی نے ابتدا میں اعلان کیا تھا کہ اگر گیانیش کمار چیف الیکشن کمشنر کے عہدے سے استعفیٰ نہیں دیتے تو 2 اکتوبر کو ممبئی سے ملک گیر احتجاج شروع کیا جائے گا۔ 25 ستمبر کو دپکے نے کہا تھا، ’’اگر گیانیش کمار کل تک استعفیٰ نہیں دیتے تو سی جے پی 2 اکتوبر کو ممبئی سے اپنا ملک گیر احتجاج شروع کرے گی اور اسے ہندوستان بھر کے شہروں تک لے جائے گی۔ آئیے، اس گاندھی جینتی پر جمہوریت کو بچانے کا عزم کریں۔‘