نئی دہلی: کیرالہ ہائی کورٹ نے مارکسوادی کمیونسٹ پارٹی (سی پی آئی ایم) کے رہنما اور کیرالہ کے سابق وزیر اعلیٰ پنرائی وجین کو بڑا جھٹکا دیتے ہوئے کوچیِن منرلز اینڈ روٹائل لمیٹڈ (سی ایم آر ایل) سے متعلق مبینہ رشوت معاملے میں جمعہ کو نگرانی اور انسدادِ بدعنوانی بیورو (وی اے سی بی) کو وجین اور دیگر افراد کے خلاف انسدادِ بدعنوانی قانون کے تحت ایف آئی آر درج کرنے کی ہدایت دی۔

عدالت نے کہا کہ انفورسمنٹ ڈائریکٹوریٹ (ای ڈی) کی جانب سے فراہم کردہ معلومات سے انسدادِ بدعنوانی قانون کے تحت جرم کیے جانے کا اشارہ ملتا ہے۔ جسٹس اے بدرالدین نے کہا کہ ای ڈی کی فراہم کردہ معلومات میں ایسے کافی ابتدائی شواہد موجود ہیں جن سے بادی النظر میں پنرائی وجین، ان کی بیٹی وینا ٹی اور وینا کے شوہر اور سی پی آئی ایم کے رکن اسمبلی پی اے محمد ریاض کے خلاف انسدادِ بدعنوانی قانون کے تحت قابلِ دست اندازی پولیس جرم کیے جانے کا پتہ چلتا ہے۔

عدالت نے کہا، ’’جب دستیاب معلومات، جن میں درج کیے گئے بیانات اور حاصل شدہ دستاویزات بھی شامل ہیں، اس بات کی نشاندہی کرتی ہیں کہ ان میں نامزد افراد نے انسدادِ بدعنوانی قانون کے تحت جرم کیا ہے، تو معاملے میں مزید ابتدائی جانچ کرنا بالکل غیر ضروری ہے۔‘‘ عدالت نے یہ بھی کہا کہ ای ڈی کی رپورٹ میں براہِ راست ایف آئی آر درج کرنے اور معاملے کی تفتیش شروع کرنے کے لیے کافی مواد موجود ہے۔