سری نگر: کشمیر کے مذہبی رہنما میر واعظ عمر فاروق نے ہفتہ کو جموں و کشمیر میں خود ساختہ مذہبی رہنما سوامی دھیان سُمت کے روحانی اور مراقبے کے پروگرام کو روکنے کے لیے وزیر اعلیٰ عمر عبداللہ سے مداخلت کا مطالبہ کیا۔ میر واعظ نے گریز وادی میں 24 سے 27 ستمبر کے درمیان ’تنتر ان سائلنس‘ نامی پروگرام منعقد کیے جانے کی اطلاعات پر تشویش ظاہر کی اور متعلقہ حکام سے اپیل کی کہ کشمیر کی مذہبی، ثقافتی اور سماجی روایات کا استحصال روکنے کے لیے کارروائی کی جائے۔

انہوں نے سوشل میڈیا پلیٹ فارم ’ایکس‘ پر ایک پوسٹ میں کہا، ’’وزیر اعلیٰ عمر عبداللہ کو فوری طور پر اس معاملے کا نوٹس لینا چاہیے اور اس استحصال کو روکنا چاہیے۔‘‘ میر واعظ نے کہا، ’’یہ انتہائی حیران کن ہے کہ کشمیر کے گریز میں اس طرح کے پروگرام کی اجازت دی جا رہی ہے، جبکہ اسی تنظیم کے ایک ایسے ہی پروگرام کو گوا پولیس نے منسوخ کر دیا تھا، کیونکہ اس کے اشتہاری مواد میں مبینہ طور پر فحش تفصیلات شامل ہونے کے باعث لوگوں میں شدید ناراضگی پیدا ہوئی تھی۔‘‘ پیپلز ڈیموکریٹک پارٹی (پی ڈی پی) کی صدر محبوبہ مفتی نے بھی اس سے قبل ایک پوسٹ میں عمر عبداللہ اور پولیس سے معاملے میں مداخلت کرکے مناسب کارروائی کرنے کی اپیل کی تھی۔