نئی دہلی: نیشنل اسٹوڈنٹس یونین آف انڈیا (این ایس یو آئی) نے جمعرات کو طلبہ اور دہلی یونیورسٹی (ڈی یو) سے متعلق مسائل کو لے کر اپنے صدر دفتر رائسینا روڈ سے جنتر منتر تک ’تالی تھالی مارچ‘ نکالا۔ این ایس یو آئی کے مطابق، تنظیم کے قومی صدر ونود جاکھڑ کی قیادت میں یہ مارچ دوپہر 2 بجے پانچ رائسینا روڈ واقع تنظیم کے صدر دفتر سے شروع ہوا۔

این ایس یو آئی کے ایک رکن نے کہا کہ اس مارچ کے ذریعے دہلی یونیورسٹی کے طلبہ کے لیے ہاسٹل کی سہولت فراہم کرنے اور ملک بھر میں سوالیہ پرچوں کے لیک ہونے کے خلاف کارروائی سمیت مختلف مطالبات اٹھائے جا رہے ہیں۔ یہ مارچ دہلی یونیورسٹی اسٹوڈنٹس یونین (ڈوسو) کے انتخابات سے ایک دن پہلے نکالا گیا۔

ڈوسو انتخابات جمعہ کو ہوں گے۔ دن کی شفٹ کے لیے ووٹنگ صبح 8:30 بجے سے دوپہر 1 بجے تک ہوگی، جبکہ شام کی شفٹ کے لیے ووٹنگ دوپہر 3 بجے سے شام 7:30 بجے تک ہوگی۔