کولکاتا: مغربی بنگال کے وزیر اعلیٰ شوبھیندو ادھیکاری کے خلاف درج ایک معاملے میں مشرقی مدنی پور پولیس نے منگل کو کلکتہ ہائی کورٹ کو بتایا کہ 2024 کے لوک سبھا انتخابات کے دوران پولیس نے از خود نوٹس لیتے ہوئے ایف آئی آر درج کی تھی اور کول گھاٹ میں واقع ایک گھر کی تلاشی کے دوران کوئی قابل اعتراض چیز نہیں ملی تھی۔ اس وقت اسمبلی میں اپوزیشن لیڈر رہنے والے شوبھیندو ادھیکاری نے تلاشی سے متعلق از خود درج کی گئی ایف آئی آر کے خلاف ہائی کورٹ سے رجوع کیا تھا۔

ہائی کورٹ نے 24 مئی 2024 کو اس ایف آئی آر پر روک لگا دی تھی۔ کول گھاٹ تھانے کے انچارج نے جسٹس سوگت بھٹاچاریہ کے سامنے ایک رپورٹ پیش کی، جس میں کہا گیا کہ تلاشی کے دوران کوئی قابل اعتراض سامان نہیں ملا اور ایسا معلوم ہوتا ہے کہ کسی ’’غلط فہمی‘‘ کی وجہ سے یہ کارروائی ہوئی تھی۔ رپورٹ میں کہا گیا کہ 2024 کے لوک سبھا انتخابات کے لیے نافذ انتخابی ضابطۂ اخلاق کے دوران ذرائع سے ملی اطلاع کی بنیاد پر مذکورہ گھر میں چھاپہ مار کر تلاشی کی کارروائی کی گئی تھی۔ رپورٹ میں کہا گیا، ’’یہ واضح کیا جاتا ہے کہ مذکورہ احاطے سے کوئی قابل اعتراض چیز نہیں ملی۔‘

‘ ادھیکاری کے وکیل مایوک مکھرجی نے عدالت کو بتایا کہ پولیس کی رپورٹ کے پیش نظر اب وہ اس عرضی پر مزید کارروائی نہیں کرنا چاہتے۔ جسٹس بھٹاچاریہ نے کہا کہ وکیل پولیس رپورٹ کے پیش نظر عرضی پر مزید سماعت نہیں چاہتے، اس لیے اسے ’’مزید کارروائی نہ کرنے‘‘ کی بنیاد پر خارج کیا جاتا ہے۔ مکھرجی نے کہا کہ از خود درج کیا گیا معاملہ اس مبینہ اطلاع کی بنیاد پر درج کیا گیا تھا کہ احاطے میں دیسی بم اور نقد رقم رکھی ہوئی ہے۔ ہائی کورٹ نے 24 مئی 2024 کو کول گھاٹ کے اس وقت کے تھانہ انچارج کی جانب سے 22 مئی کو درج کی گئی از خود ایف آئی آر پر روک لگا دی تھی۔