نئی دہلی: لوک سبھا میں قائد حزب اختلاف راہل گاندھی اور دیگر اپوزیشن رہنماؤں کے الیکشن کمیشن کے دفتر کے قریب احتجاج کے دوران کمیشن نے منگل کو کہا کہ کسی بھی سیاسی جماعت کی جانب سے اس سے ملاقات کے لیے کوئی درخواست نہیں کی گئی تھی۔ اس سے پہلے ’انڈیا‘ اتحاد نے پارلیمنٹ اسٹریٹ سے الیکشن کمیشن کے دفتر تک احتجاجی مارچ کیا، جس کے دوران کافی ہنگامہ ہوا۔

راہل گاندھی، کانگریس رکن پارلیمنٹ پرینکا گاندھی واڈرا اور کچھ دیگر رہنما الیکشن کمیشن کے دفتر تک پہنچنے کی کوشش کے دوران آکاشوانی بھون کے احاطے میں بیٹھ گئے۔ جب الیکشن کمیشن کے حکام سے پوچھا گیا کہ کیا راہل گاندھی سمیت ’انڈیا‘ اتحاد کے رہنماؤں نے کمیشن سے ملاقات کی درخواست کی تھی، تو انہوں نے کہا کہ منگل کو کسی بھی سیاسی جماعت کی جانب سے ملاقات کے لیے کوئی درخواست نہیں دی گئی تھی۔

مارچ روکے جانے کے بعد سماج وادی پارٹی کے سربراہ اکھلیش یادو، ترنمول کانگریس کے ارکان پارلیمنٹ ابھیشیک بنرجی اور ڈیرک او برائن سمیت اپوزیشن کے کئی رہنماؤں کو پولیس نے حراست میں لے لیا۔ اس سے قبل راہل گاندھی، پرینکا گاندھی اور کئی دیگر ارکان پارلیمنٹ کو پارلیمنٹ اسٹریٹ پر آکاشوانی بھون اور نیتی آیوگ کے دفتر کے سامنے سکیورٹی اہلکاروں نے روک دیا تھا۔

اپوزیشن رہنما چیف الیکشن کمشنر گیانیش کمار کے استعفے کا مطالبہ کرتے ہوئے مارچ کر رہے تھے۔ یہ مارچ 25 ستمبر کو شائع ہونے والی اخبار ’انڈین ایکسپریس‘ کی ایک رپورٹ کے بعد گیانیش کمار کے استعفے کے مطالبے کو لے کر رہنماؤں اور سماجی کارکنوں کے جاری احتجاج کا حصہ تھا۔ رپورٹ میں ایس آئی آر کے عمل میں مبینہ بے ضابطگیوں اور الیکشن کمشنروں کے درمیان اختلافات کا دعویٰ کیا گیا تھا۔