نئی دہلی: بھارتیہ جنتا پارٹی (بی جے پی) کے قومی صدر نیتن نوین نے کانگریس لیڈر راہل گاندھی کے ایک بیان کا جواب دیتے ہوئے جمعہ کو کہا کہ بی جے پی کے رہنماؤں میں مسلسل اقتدار میں رہنے کا اعتماد عوام کی خدمت اور ان کا اعتماد حاصل کرنے سے آتا ہے۔

نوین نے یہاں دادیہ میں ’سیوا سنکلپ سبھا‘ سے خطاب کرتے ہوئے کہا کہ آج ملک ’ترقی یافتہ ہندوستان‘ کے خواب کے ساتھ آگے بڑھ رہا ہے۔ انہوں نے کہا، ’’اپوزیشن لیڈر راہل گاندھی پوچھ رہے تھے کہ بی جے پی کی حکومتیں مسلسل کیوں آتی ہیں؟ بی جے پی کے رہنما کیوں کہتے ہیں کہ ہم اگلے 25 سال تک عوام کی خدمت کریں گے؟ میں انہیں بتانا چاہتا ہوں کہ یہ اعتماد عوام کی خدمت سے آتا ہے، یہ اعتماد عوام کا بھروسہ جیتنے سے آتا ہے اور عوام کے لیے کام کرنے سے آتا ہے۔‘‘

بی جے پی صدر نے کہا، ’’آج ملک ترقی یافتہ ہندوستان کے خواب کے ساتھ آگے بڑھ رہا ہے۔ بی جے پی کی قیادت، کارکن اور تنظیم اس عزم کے ساتھ آگے بڑھ رہے ہیں کہ 2047 تک ترقی یافتہ ہندوستان کے خواب کو پورا کرنا ہے۔ کیونکہ ہمارا مقصد ہے... قوم سب سے پہلے۔‘‘ انہوں نے کہا، ’’ہم صرف اقتدار کے لیے نہیں ہیں۔ ہم صرف حکومت بنانے کے لیے نہیں ہیں۔ ہم صرف اپنی جیت نہیں دیکھتے۔ ہمارا واضح مقصد عوام کی خدمت ہے۔‘‘