نئی دہلی: حیدرآباد میں قومی تحقیقاتی ایجنسی (این آئی اے) کی ایک خصوصی عدالت نے بنگلہ دیشی خواتین کی انسانی اسمگلنگ سے متعلق 2019 کے ایک معاملے میں آٹھ بنگلہ دیشی شہریوں سمیت نو افراد کو عمر قید کی سزا سنائی ہے۔ حکام نے جمعہ کو یہ اطلاع دی۔ حکام کے مطابق عدالت نے جمعرات کو تمام مجرموں پر مجموعی طور پر ایک لاکھ 37 ہزار روپے جرمانہ بھی عائد کیا۔ جرمانہ ادا نہ کرنے کی صورت میں انہیں مزید تین ماہ قید کی سزا بھگتنی ہوگی۔

سزا پانے والوں میں آٹھ بنگلہ دیشی شہری اور ایک ہندوستانی شہری شامل ہیں۔ این آئی اے کے مطابق یہ معاملہ بنگلہ دیشی خواتین کو اچھی ملازمت اور بہتر تنخواہ کا لالچ دے کر ہندوستان لانے اور بعد میں انہیں جسم فروشی پر مجبور کرنے سے متعلق ہے۔

تلنگانہ پولیس نے ستمبر 2019 میں ایک کارروائی کے بعد حیدرآباد میں اس معاملے کی ابتدائی ایف آئی آر درج کی تھی۔ کارروائی کے دوران جل پلی گاؤں میں جسم فروشی کے لیے استعمال کیے جانے والے ایک احاطے سے تین بنگلہ دیشی خواتین کو آزاد کرایا گیا تھا۔ اس کے علاوہ حیدرآباد کے بالاپور میں محمود کالونی کے ایک مکان سے بھی ایک خاتون کو بازیاب کرایا گیا تھا۔ این آئی اے نے بعد میں اس معاملے کی تفتیش اپنے ہاتھ میں لے لی اور 12 اکتوبر 2019 کو کیس دوبارہ درج کیا۔

تفتیش کے دوران 2019 اور 2020 میں مغربی بنگال، تلنگانہ اور دیگر مقامات سے ملزمان کو گرفتار کیا گیا۔ این آئی اے کے بیان کے مطابق ملزمان روح الامین دھالی، محمد یوسف خان عرف محمد عمران، بیتی بیگم عرف خدیجہ شیخ، امام الحق غازی عرف محمد رانا حسین، محمد المامون، سوجیب شیخ، سریش کمار داس عرف ساگر، محمد عبداللہ منشی عرف عبدل سرکار اور محمد ایوب شیخ کے خلاف مختلف دفعات کے تحت مقدمہ چلایا گیا۔ ان کے خلاف تعزیرات ہند، غیر ملکی شہری قانون 1946 اور غیر اخلاقی جسم فروشی کی روک تھام کے قانون 1956 کی مختلف دفعات کے تحت کارروائی کی گئی۔