سندھاوالی بائی پاس پر واقع رانا پبلک اسکول میں منعقدہ تقریب کا عنوان ’’اردو: ایک زندہ و جاوید زبان‘‘ تھا۔ اس موقع پر ادیبوں، ماہرین تعلیم، صحافیوں، دانشوروں اور محبان اردو نے شرکت کی۔ تقریب میں اردو زبان و ادب کی خدمات انجام دینے والی شخصیات، اردو اساتذہ اور ضلع کے تقریباً 20 انٹر کالجوں کے نمایاں کارکردگی دکھانے والے طلبہ و طالبات کو اعزازات سے نوازا گیا۔

مہمان خصوصی جامعہ ہمدرد نئی دہلی کے پروفیسر ڈاکٹر شہریار نے کہا کہ اردو ہندوستان کی مشترکہ تہذیبی وراثت کا انمول سرمایہ ہے۔ اس زبان کو فروغ دینے کے لیے تعلیمی اداروں، ادیبوں اور معاشرے کے تمام طبقات کو مل کر کوشش کرنی چاہیے۔ مہمان اعزازی ڈاکٹر انیس احمد نے کہا کہ نئی نسل کو اردو سے جوڑنا وقت کی اہم ضرورت ہے اور اس کے لیے اسکولوں اور کالجوں میں اردو تعلیم کے مواقع بڑھانے ہوں گے۔

علی گڑھ سے آئے ایس یو خان نے علامہ اقبال کی شاعری کا حوالہ دیتے ہوئے کہا کہ ان کا کلام انسان کو خودداری، خود اعتمادی، بلند حوصلے اور محنت کا پیغام دیتا ہے۔ ’’خودی کو کر بلند اتنا‘‘ اور ’’سارے جہاں سے اچھا ہندوستاں ہمارا‘‘ جیسے اشعار آج بھی نوجوانوں میں حوصلہ اور وطن سے محبت کا جذبہ پیدا کرتے ہیں۔ ایڈیشنل سول جج جسیم احمد نے کہا کہ زبان اور ادب معاشرے کو جوڑنے کا ذریعہ ہیں اور اردو کی ادبی وراثت کو آگے بڑھانے میں ایسی تقریبات اہم کردار ادا کرتی ہیں۔

یو ڈی او کے کنوینر تحسین علی عساروی اور اسد فاروقی نے کہا کہ اردو اترپردیش کی دوسری سرکاری زبان ہونے کے باوجود اس کی تعلیم اور فروغ کے لیے مزید کوششوں کی ضرورت ہے۔ اردو کو صرف مشاعروں اور ادبی محفلوں تک محدود رکھنے کے بجائے تعلیم، روزگار اور روزمرہ زندگی میں بھی جگہ دینی چاہیے۔ تنظیم کے ضلع صدر کلیم تیاگی نے کہا کہ اردو کسی ایک مذہب یا طبقے کی زبان نہیں بلکہ محبت، تہذیب اور انسانیت کی زبان ہے۔ انہوں نے والدین سے اپیل کی کہ وہ اپنے بچوں کو اردو کی تعلیم دلائیں۔ اس موقع پر شمیم قصار نے تنظیم کی سالانہ رپورٹ بھی پیش کی۔

تقریب کا اہم حصہ ضلع کے تقریباً 20 انٹر کالجوں کے ان طلبہ و طالبات کی حوصلہ افزائی تھا جنہوں نے اردو مضمون میں نمایاں نمبر حاصل کیے تھے۔ ان کے اردو اساتذہ کو بھی تعلیمی خدمات کے اعتراف میں اعزازات پیش کیے گئے۔ اس کے علاوہ ڈاکٹر صداقت دیوبندی، ڈاکٹر صداقت اللہ خان علیگ، حاجی محمد احمد خان اور وارث علی سمیت اردو زبان و ادب کی خدمت کرنے والی متعدد شخصیات کو اعزازات سے نوازا گیا۔ رانا پبلک اسکول کے منیجر نور سلیم رانا اور صدر شمیہ زینت کو بھی ان کی خدمات کے اعتراف میں اعزاز پیش کیا گیا۔

تقریب کی صدارت ڈاکٹر شمیم الحسن نے کی۔ انہوں نے اعزاز حاصل کرنے والے طلبہ و طالبات کو مبارکباد دیتے ہوئے کہا کہ یہ اعزاز ان کی محنت اور لگن کا اعتراف ہے۔ انہوں نے یو ڈی او کی اردو کے فروغ کے لیے جاری کوششوں کو سراہا اور لوگوں سے اس مشن میں تعاون کی اپیل کی۔

پروگرام میں علامہ اقبال کی شاعری کو بھی خصوصی طور پر پیش کیا گیا۔ ڈاکٹر تنویر گوہر، حاجی سلامت راہی اور صداقت دیوبندی نے اقبال کی شان میں اشعار سنائے۔ رانا پبلک اسکول، نواب عظمت علی گرلز انٹر کالج اور مدینہ پبلک اسکول کے طلبہ و طالبات نے مشاعرے، قوالی، تقریریں، اردو نظمیں اور اقبال کا کلام پیش کیا، جسے حاضرین نے خوب سراہا۔

تقریب میں یو ڈی او کے سرپرستوں، عہدیداروں اور اراکین کے علاوہ امیر اعظم خان ایڈووکیٹ، کنور محمد عارف رانا، عبدالصمد، سلیم ملک، ڈاکٹر فہد فاروقی، ڈاکٹر عادل چودھری، انجینئر عثمان احمد، ڈاکٹر گوہر کھتولی، ظفریاب خان، الطاف مشعل، ہاشم حیدری، مولانا سعید الزماں، ڈاکٹر نازش فاروقی، ڈاکٹر آس محمد امین، بلقیس تیاگی، شاہانہ پروین، شفا پروین، اریبہ پروین، خدیجہ خاتون اور ڈاکٹر فردوس علی گڑھ سمیت سینکڑوں محبان اردو موجود رہے۔

پروگرام کی نظامت کلیم تیاگی اور مس اُجالا عباسی نے مشترکہ طور پر انجام دی۔ آخر میں منتظمین نے مہمانوں، اعزاز یافتہ شخصیات، اساتذہ، طلبہ و طالبات اور شرکاء کا شکریہ ادا کیا۔