جے پور: راجستھان میں پولیس کی مختلف ٹیموں نے ایک ہی دن میں کئی اضلاع کے 17,049 نشان زدہ مشتبہ ٹھکانوں پر چھاپے مار کر مجموعی طور پر 7,744 جرائم پیشہ افراد اور سماج دشمن عناصر کو گرفتار کیا ہے۔ حکام نے بدھ کو یہ اطلاع دی۔ سرکاری بیان کے مطابق مطلوب مجرموں، سماج دشمن عناصر اور امن و امان کے لیے خطرہ بننے والے عناصر کی گرفتاری کے لیے خصوصی مہم چلائی گئی۔

اس کے لیے پولیس کے 12,151 افسران اور اہلکاروں پر مشتمل 2,961 خصوصی ٹیمیں تشکیل دی گئی تھیں۔ بیان کے مطابق گرفتار کیے گئے افراد میں 55 انعامی مجرم اور 354 بدنام زمانہ جرائم پیشہ افراد بھی شامل ہیں۔ اس کارروائی کے دوران ٹونک ضلع میں 97 ٹیموں نے 363 مقامات پر چھاپے مار کر سب سے زیادہ 407 مجرموں کو گرفتار کیا۔

بھیلواڑہ میں 133 ٹیموں نے 305 ٹھکانوں پر کارروائی کرتے ہوئے 330 ملزمان کو گرفتار کیا، جبکہ اجمیر میں 122 ٹیموں نے 598 مقامات پر چھاپے مار کر 280 جرائم پیشہ افراد کو گرفتار کیا۔ ریاست کے پولیس ڈائریکٹر جنرل راجیو کمار شرما نے بتایا کہ ریاست میں امن، سلامتی اور خوف سے پاک ماحول قائم کرنے کے مقصد سے یہ خصوصی ’ایریا ڈومینیشن‘ مہم چلائی گئی ہے۔ انہوں نے کہا کہ عام لوگوں میں اعتماد اور جرائم پیشہ افراد میں خوف پیدا کرنے کے لیے اس طرح کی بڑے پیمانے پر پولیس کارروائیاں آئندہ بھی باقاعدگی سے جاری رہیں گی۔