ممبئی: ممبئی ہائی کورٹ نے سابق طلبہ کے لیے واٹس ایپ گروپ بنانے پر ایک پروفیسر کو لازمی طور پر ریٹائر کرنے کے ٹاٹا انسٹی ٹیوٹ آف سوشل سائنسز (ٹی آئی ایس ایس) کے حکم کو منسوخ کر دیا ہے۔ عدالت نے کہا کہ ادارے کی اجازت کے بغیر صرف ایک واٹس ایپ گروپ بنانا کسی کامیاب تعلیمی کیریئر کو ختم کرنے کی بنیاد نہیں بن سکتا۔

ہائی کورٹ نے کہا کہ پروفیسر ڈاکٹر سواپن گارین کو دی گئی سزا غیرمعقول اور مبینہ خلاف ورزی کے مقابلے میں بہت زیادہ سخت تھی۔ عدالت نے انگریز بیرسٹر اور جج لارڈ ڈپلک کے ایک مشہور قول کا حوالہ دیتے ہوئے کہا، ’’اخروٹ توڑنے کے لیے آپ ہتھوڑے کا استعمال نہیں کر سکتے۔‘

‘ جسٹس ایم ایس کارنک اور جسٹس سندیش پاٹل کی ڈویژن بینچ نے 16 ستمبر کو دیے گئے اپنے فیصلے میں کہا کہ پروفیسر کے خلاف بنیادی الزام صرف یہ تھا کہ انہوں نے ٹی آئی ایس ایس کے سابق طلبہ کا ایک واٹس ایپ گروپ بنایا تھا اور اسے ’پلیسمنٹ سروس‘ کے لیے استعمال کر رہے تھے۔

بینچ نے کہا کہ ڈاکٹر گارین کے خلاف لازمی ریٹائرمنٹ کی سزا کا حکم درست نہیں تھا اور ایسا کوئی ثبوت بھی موجود نہیں ہے جس سے یہ ثابت ہو کہ وہ پلیسمنٹ سروس کے لیے رقم وصول کر رہے تھے۔ ہائی کورٹ نے کہا کہ واٹس ایپ گروپ ٹی آئی ایس ایس کے سابق طلبہ کے لیے ایک ایسا پلیٹ فارم تھا، جہاں گروپ کے ارکان ایک دوسرے کے روزگار اور کام سے متعلق معلومات شیئر کر سکتے تھے۔

عدالت نے کہا کہ صرف اس وجہ سے کہ گروپ بنانے کے لیے ادارے سے اجازت نہیں لی گئی تھی، اتنی سخت سزا دینے کی کوئی مضبوط بنیاد نہیں بنتی۔ بینچ نے پروفیسر کو لازمی طور پر ریٹائر کرنے کے حکم کو منسوخ کرتے ہوئے ٹی آئی ایس ایس کو ہدایت دی کہ وہ گارین کو ملازمت سے ہٹائے جانے کی تاریخ سے ان کی ریٹائرمنٹ کی تاریخ تک کا 50 فیصد بقایا معاوضہ ادا کرے۔

گارین نے اپنی عرضی میں 2017 کے اس حکم کو منسوخ کرنے کی درخواست کی تھی، جس کے ذریعے انہیں لازمی ریٹائرمنٹ کی سزا دی گئی تھی۔ انہوں نے ٹی آئی ایس ایس کو انہیں دوبارہ ملازمت پر بحال کرنے کی ہدایت دینے کی بھی درخواست کی تھی۔ عرضی کے مطابق، گارین کو 1985 میں ٹی آئی ایس ایس میں پروفیسر مقرر کیا گیا تھا۔ یہ وہی ادارہ ہے جہاں سے انہوں نے خود بھی تعلیم حاصل کی تھی۔