نئی دہلی: مرکزی وزیر تجارت و صنعت پیوش گوئل نے عالمی سرمایہ کاروں سے ہندوستان میں سرمایہ کاری کرنے اور صنعتوں سے معیار و پائیداری پر توجہ دینے کی اپیل کرتے ہوئے کہا ہے کہ موجودہ عالمی غیر یقینی صورت حال کے درمیان ہندوستان سرمایہ کاری کے لیے ایک محفوظ مقام ہے۔

پیوش گوئل جمعرات کو نئی دہلی میں منعقدہ ’سی آئی آئی پارٹنرشپ کانفرنس 2026‘ سے خطاب کر رہے تھے۔ انہوں نے عالمی سرمایہ کاروں سے اپیل کی کہ وہ اپنے اگلے کارخانے، ڈیزائن سینٹر اور گلوبل کیپبیلٹی سینٹر (جی سی سی) کے قیام کے لیے ہندوستان کا انتخاب کریں۔

انہوں نے کہا، ’’اپنا اگلا کارخانہ، ڈیزائن سینٹر اور گلوبل کیپبیلٹی سینٹر قائم کرنے کے لیے ہندوستان کو اپنا مرکز بنائیں۔‘‘ مرکزی وزیر نے تجارتی شراکت داروں سے بھی ہندوستان میں کاروباری مواقع تلاش کرنے کی اپیل کی۔ ان کا کہنا تھا کہ ہندوستان کے کئی شعبوں میں سرمایہ کاری کے وسیع امکانات موجود ہیں۔ گوئل نے کہا، ’’کارخانوں، ہوٹلوں اور ڈیٹا سینٹروں میں سرمایہ کاری کریں، کیونکہ ہندوستان ایک محفوظ مقام ہے۔‘‘ انہوں نے صنعتوں پر زور دیا کہ وہ اپنی مصنوعات اور خدمات کے معیار کے ساتھ پائیداری کو بھی ترجیح دیں۔