بھوپال، 14 نومبر: مدھیہ پردیش میں خصوصی مختصر نظرثانی (SSR-2027) کے تحت جمعرات کو جاری کی گئی مسودہ ووٹر لسٹ میں 8.19 لاکھ سے زائد ووٹروں کا اضافہ درج کیا گیا ہے۔ اس اضافے کے ساتھ ریاست میں ووٹروں کی مجموعی تعداد بڑھ کر تقریباً 5.48 کروڑ ہو گئی ہے۔ حکام نے یہ اطلاع دی۔ الیکشن کمیشن کے اعداد و شمار کے مطابق، رواں سال فروری میں شائع ہونے والی خصوصی گہری نظرثانی (SIR) کی حتمی ووٹر لسٹ کے مقابلے نئی مسودہ فہرست میں 4,38,361 خواتین، 3,80,169 مرد اور 33 ٹرانس جینڈر ووٹروں کا اضافہ ہوا ہے۔ نئے ناموں کے اندراج کے بعد مدھیہ پردیش میں رجسٹرڈ ووٹروں کی مجموعی تعداد بڑھ کر 5,47,99,628 ہو گئی ہے۔

ان میں 2,82,85,144 مرد، 2,65,13,547 خواتین اور 937 ٹرانس جینڈر ووٹر شامل ہیں۔ فروری میں شائع ہونے والی ایس آئی آر کی حتمی فہرست میں ریاست میں ووٹروں کی کل تعداد 5,39,81,065 تھی۔ ان میں 2,79,04,975 مرد، 2,60,75,186 خواتین اور 904 ٹرانس جینڈر ووٹر شامل تھے۔ حکام کے مطابق عمر کے لحاظ سے 30 سے 39 سال کے ووٹروں کی تعداد سب سے زیادہ 1,40,50,865 ہے۔ اس کے بعد 20 سے 29 سال کی عمر کے ووٹروں کی تعداد 1,29,48,107 ہے۔

الیکشن کمیشن نے مسودہ ووٹر لسٹ پر دعوے اور اعتراضات درج کرانے کے لیے 11 دسمبر تک کی مہلت دی ہے۔ اس کے بعد 4 جنوری 2027 کو حتمی ووٹر لسٹ شائع کی جائے گی۔ ووٹروں کی تعداد میں یہ اضافہ اس لیے بھی اہم ہے کیونکہ ایس آئی آر کے عمل کو لے کر سیاسی تنازع پیدا ہوا تھا۔ کانگریس نے اس کارروائی کے دوران اہل ووٹروں کے نام فہرست سے حذف کیے جانے کا الزام لگایا تھا، جبکہ حکمراں بھارتیہ جنتا پارٹی (بی جے پی) نے اس عمل کا دفاع کرتے ہوئے کہا تھا کہ نظرثانی کا مقصد فوت ہو چکے، نقل مکانی کر چکے، غیر حاضر اور ایک سے زائد مرتبہ درج ووٹروں کے نام فہرست سے ہٹانا تھا۔

مدھیہ پردیش میں اگلا اسمبلی انتخابات 2028 کے اواخر میں ہونے کی توقع ہے۔ سال 2011 کی مردم شماری کے مطابق ریاست کی آبادی 7.26 کروڑ تھی، جبکہ اب اس کے بڑھ کر 9.05 کروڑ ہونے کا اندازہ لگایا گیا ہے۔ ریاستی اسمبلی میں مجموعی طور پر 230 نشستیں ہیں، جن میں سے 47 نشستیں درج فہرست قبائل (ST) اور 35 نشستیں درج فہرست ذاتوں (SC) کے لیے محفوظ ہیں۔ وہیں ریاست میں لوک سبھا کی 29 نشستیں ہیں، جن میں 6 درج فہرست قبائل اور 4 درج فہرست ذاتوں کے لیے مخصوص ہیں۔