پونے: وزیر اعظم نریندر مودی نے منگل کو کہا کہ 2014 سے پہلے ہندوستان میں 248 کلومیٹر طویل میٹرو نیٹ ورک کام کر رہا تھا، جبکہ اب اس کی لمبائی بڑھ کر 1200 کلومیٹر ہوگئی ہے۔ انہوں نے زور دیا کہ شہروں میں بہتر بنیادی ڈھانچہ ملک کی اقتصادی ترقی کو تیز کرنے میں مددگار ثابت ہوگا۔

ویڈیو کانفرنسنگ کے ذریعے پونے میٹرو کی لائن 3 (پنک لائن) کا افتتاح کرتے ہوئے مودی نے کہا، ’’جب 2014 میں ملک نے این ڈی اے کو خدمت کا موقع دیا تو ہم نے شہروں میں رہنے والے متوسط طبقے کی زندگی آسان بنانے اور آمد و رفت کو بہتر کرنے کے عزم کے ساتھ کام شروع کیا۔‘‘ مودی نے دوسرے مرحلے کے تحت میٹرو کے 4 نئے کوریڈورز کی بنیاد بھی رکھی۔

ان منصوبوں پر مجموعی طور پر تقریباً 21,800 کروڑ روپے خرچ کیے جائیں گے۔ وزیر اعظم نے 23 کلومیٹر طویل پنک لائن کا افتتاح کیا، جس کی تعمیر پر 8,300 کروڑ روپے سے زیادہ لاگت آئی ہے۔ یہ کوریڈور ہنجواڑی کے آئی ٹی مرکز کو ڈسٹرکٹ کورٹ میٹرو اسٹیشن سے جوڑے گا۔ امید ہے کہ اس سے ہزاروں آئی ٹی پیشہ وروں کو روزانہ سفر میں سہولت ملے گی، ٹریفک جام میں کمی آئے گی اور ذاتی گاڑیوں پر انحصار بھی کم ہوگا۔

پنک لائن کو خواتین آپریٹرز چلائیں گی۔ اس کی بجلی کی تقریباً 30 فیصد ضرورت شمسی توانائی سے پوری کی جائے گی۔ مودی نے پونے میٹرو کے دوسرے مرحلے کی بھی بنیاد رکھی، جس پر تقریباً 13,500 کروڑ روپے خرچ ہونے کا اندازہ ہے۔ اس مرحلے میں 4 کوریڈورز، یعنی لائن 2اے، 2بی، 4 اور 4اے شامل ہیں۔ یہ کوریڈور شہر کے اہم رہائشی، تجارتی اور آئی ٹی مراکز کو آپس میں جوڑیں گے۔