ٹوکیو۔ ہندوستان اور جاپان 2027 میں اپنے سفارتی تعلقات کے قیام کی 75ویں سالگرہ منائیں گے۔ جاپان کی کابینہ میں ردوبدل کے بعد پہلی پریس کانفرنس میں وزیر خارجہ توشیمتسو موتیگی نے ہندوستان کے ساتھ تعلقات کو مزید مضبوط بنانے اور قانون کی حکمرانی پر مبنی آزاد اور کھلے بین الاقوامی نظام کے تصور کے تحت تنازعات کے حل میں قیادت کا کردار ادا کرنے پر زور دیا۔

20 ستمبر کے بعد اقوام متحدہ کی جنرل اسمبلی کے اجلاس کے موقع پر جاپان کے وزیر خارجہ توشیمتسو موتیگی ہندوستان سمیت مختلف ممالک کے وزرائے خارجہ کے ساتھ ہونے والی ملاقاتوں میں شرکت کریں گے۔ 2026 جاپان کے اقوام متحدہ میں شمولیت کی 60ویں سالگرہ کا سال بھی ہے۔ جاپان اسے عالمی سطح پر تیزی سے بدلتے حالات اور مختلف تنازعات کے حل کے لیے سفارتی قیادت کو مضبوط بنانے کے ایک اہم موقع کے طور پر دیکھ رہا ہے۔

وزیر خارجہ توشیمتسو موتیگی نے ہندوستان اور جاپان کے تعلقات کا ذکر کرتے ہوئے کہا کہ دونوں ممالک کے درمیان خصوصی اسٹریٹجک شراکت داری قائم ہے۔ ان کے مطابق ہندوستان ایک قابل اعتماد شراکت دار ہے جو دونوں ممالک کے درمیان مشترکہ اسٹریٹجک سمت کو سمجھتا ہے۔انہوں نے کہا کہ ہندوستان اور جاپان کے سفارتی تعلقات کے قیام کی 75ویں سالگرہ 2027 میں دونوں ممالک کے مستقبل کے امکانات کو مشترکہ طور پر سامنے لانے کا سال ہوگا۔ اس سلسلے میں ثقافت۔ فنون۔ کھیل۔ سائنس اور مقامی اداروں کے درمیان باہمی تبادلے سمیت مختلف شعبوں میں متعدد پروگراموں کی منصوبہ بندی کی جارہی ہے۔

موتیگی نے کہا کہ دونوں ممالک کے تعلقات میں اقتصادی سلامتی سمیت سلامتی کے تحفظ کے تصور پر بھی اتفاق پایا جاتا ہے۔ اقتصادی سرمایہ کاری اور جدت طرازی سے فائدہ اٹھاتے ہوئے ہندوستان اور جاپان کو ایک مضبوط اور باہمی طور پر تکمیلی تعلقات قائم کرنے چاہئیں۔جاپان کے وزیر خارجہ توشیمتسو موتیگی اور جاپانی حکومت اب اس بات پر نظر رکھے ہوئے ہیں کہ ہندوستانی حکومت اس دعوت اور پیش رفت کا کس طرح جواب دیتی ہے۔