نئی دہلی: مرکزی وزیر برائے نئی اور قابل تجدید توانائی پرہلاد جوشی نے کہا ہے کہ ہندوستان نے قابل تجدید توانائی کے شعبے میں خود کو ایک بڑی عالمی طاقت کے طور پر منوا لیا ہے۔ ہندوستان کی بڑھتی ہوئی صلاحیت، بلند اہداف اور صاف توانائی کے تیزی سے پھیلاؤ سے ظاہر ہوتا ہے کہ ملک عالمی توانائی کی منتقلی میں ایک اہم کردار ادا کرنے والا ملک بن کر ابھرا ہے۔ ’بھارت قابل تجدید توانائی چوٹی کانفرنس اور ایکسپو 2026‘ کے اختتام کے بعد ایک پریس کانفرنس سے خطاب کرتے ہوئے جوشی نے کہا کہ بھارت منڈپم میں منعقدہ اس چار روزہ پروگرام میں دنیا بھر کے پالیسی سازوں، سرمایہ کاروں، صنعت کاروں اور اختراع کاروں نے شرکت کی۔

یہ پروگرام قابل تجدید توانائی کے شعبے میں ہندوستان کے سب سے بڑے عالمی پلیٹ فارموں میں سے ایک بن کر سامنے آیا ہے۔ وزیر نے اس بات پر زور دیا کہ پہلی مرتبہ قابل تجدید توانائی سے متعلق 3 بڑے پروگرام ایک ساتھ منعقد کیے گئے۔ انہوں نے کہا کہ اس چوٹی کانفرنس نے نہ صرف قابل تجدید توانائی کے شعبے میں ہندوستان کی کامیابیوں کو پیش کیا بلکہ عالمی توانائی کی منتقلی کے اگلے مرحلے کے لیے بھی بنیاد تیار کی۔ انہوں نے کہا، ’’پیغام بالکل واضح ہے کہ ہندوستان قابل تجدید توانائی کے شعبے میں ایک بڑی عالمی طاقت بن کر ابھرا ہے اور دنیا نے اس کا نوٹس لیا ہے۔‘‘

جوشی نے مزید بتایا کہ ہندوستان نے قابل تجدید توانائی کے اپنے اہداف میں اضافہ کیا ہے۔ پہلے 500 گیگاواٹ کا ہدف مقرر کیا گیا تھا، جسے اب بڑھا کر 2030 سے 2035 تک 800 گیگاواٹ کر دیا گیا ہے۔ انہوں نے کہا، ’’ہم اس سمت میں مسلسل آگے بڑھ رہے ہیں اور ہمیں پورا بھروسا ہے کہ ہم 500 گیگاواٹ کا ہدف حاصل کر لیں گے۔ ممکن ہے کہ ہم مقررہ وقت سے پہلے ہی اسے پورا کر لیں۔ اس چوٹی کانفرنس میں ہونے والی بات چیت اور اس کے نتائج نے ہندوستان کے قابل تجدید توانائی کے سفر کے بارے میں ہمارے اعتماد کو مزید مضبوط کیا ہے۔‘‘

جوشی نے بتایا کہ ملک کو اپنی پہلی 100 گیگاواٹ توانائی کی صلاحیت حاصل کرنے میں کئی دہائیاں لگیں، جب کہ اگلی 100 گیگاواٹ صلاحیت صرف 7 سال میں حاصل کی گئی۔ اس کے بعد تیسری 100 گیگاواٹ صلاحیت کا ہدف 2024 سے 2026 کے درمیان، یعنی محض 2 سال میں حاصل کر لیا گیا۔ یہ ملک میں قابل تجدید توانائی کی صلاحیت میں اضافے کی تیز رفتار کو ظاہر کرتا ہے۔ چوٹی کانفرنس کے پیمانے اور اس میں شرکت کے بارے میں بات کرتے ہوئے جوشی نے کہا کہ بی آر ای ایس 2026 ہندوستان میں اب تک قابل تجدید توانائی کے شعبے کا سب سے بڑا پروگرام تھا۔ 4 روزہ اس پروگرام میں 75,000 سے زیادہ افراد نے شرکت کی۔

اس کے علاوہ 8 شراکت دار ممالک، 32 بین الاقوامی وزرا اور 14 ریاستوں و مرکز کے زیر انتظام علاقوں کے نمائندے بھی اس میں شریک ہوئے۔ افتتاحی اجلاس میں وزیر اعظم نریندر مودی کے خطاب کا ذکر کرتے ہوئے جوشی نے کہا کہ ہندوستان کو اگلے 10 سے 17 برسوں میں غیر فوسل ایندھن پر مبنی توانائی کی صلاحیت میں مزید 500 گیگاواٹ اضافہ کرنے کا ہدف دیا گیا ہے۔