کولمبو: ہندوستان نے سری لنکا کو تپ دق کے علاج اور اس پر قابو پانے کی کوششوں میں مدد کے لیے 3 ٹن ضروری انسداد تپ دق ادویات فراہم کی ہیں۔ ہندوستان کے سری لنکا میں ہائی کمشنر سنتوش جھا نے بدھ کو ادویات کی یہ کھیپ سری لنکا کے وزیر صحت و ماس میڈیا نلندا جے تیسہ کے حوالے کی۔سنتوش جھا نے سوشل میڈیا پلیٹ فارم ایکس پر کہا کہ یہ ادویات سری لنکا میں تپ دق کے علاج اور اس پر قابو پانے کی کوششوں میں معاون ثابت ہوں گی اور ملک کے ٹی بی سے نمٹنے کے نظام کو مزید مضبوط کریں گی۔

اس سے قبل 28 ستمبر کو ہندوستان کے وزیر خارجہ ایس جے شنکر نے بتایا تھا کہ نئی دہلی نے ہندوستانی فضائیہ کے طیارے کے ذریعے سری لنکا کو تقریباً 3 ٹن انسداد تپ دق ادویات روانہ کی ہیں۔ انہوں نے کہا تھا کہ ہندوستان سری لنکا کے عوامی صحت کے نظام کو مضبوط بنانے کے لیے تعاون جاری رکھے گا۔ہندوستان اور سری لنکا کے درمیان صحت کے شعبے میں تعاون کا سلسلہ جاری ہے۔ 16 ستمبر کو سری لنکا کے ضلع مانار کے ڈسٹرکٹ جنرل اسپتال میں دو منزلہ حادثات اور ایمرجنسی یونٹ کی تعمیر کا کام بھی شروع ہوا تھا۔ اس منصوبے کے لیے ہندوستان نے 600 ملین سری لنکن روپے کی گرانٹ فراہم کی ہے۔

اس موقع پر سری لنکا کے صدر انورا کمارا ڈسانائیکے اور وزیر صحت نلندا جے تیسہ کے ساتھ ہندوستانی ہائی کمشنر سنتوش جھا بھی موجود تھے۔سنتوش جھا نے کہا کہ ہندوستانی گرانٹ سے تعمیر ہونے والا یہ یونٹ ضروری طبی آلات سے بھی لیس کیا جائے گا تاکہ ہنگامی حالات میں مریضوں کو سنہری وقت کے دوران بروقت طبی امداد فراہم کی جا سکے۔انہوں نے اس منصوبے کو ہندوستان اور سری لنکا کے دیرینہ دوطرفہ تعلقات کا حقیقی ثبوت قرار دیتے ہوئے کہا کہ دونوں حکومتیں عوام پر مرکوز ترقی کے لیے مشترکہ طور پر کام کرنے کے لیے پرعزم ہیں۔