نئی دہلی: کانگریس کے تنظیمی امور کے جنرل سکریٹری کے سی وینوگوپال نے بدھ کو کہا کہ ’انڈیا‘ اتحاد کے رہنماؤں نے صدر دروپدی مرمو سے ملاقات کے لیے وقت مانگا ہے، لیکن ابھی تک راشٹرپتی بھون سے کوئی جواب نہیں ملا ہے۔ وینوگوپال نے کہا کہ اس سلسلے میں پہلی درخواست 2 اکتوبر کو بھیجی گئی تھی۔ اس کے بعد راشٹرپتی بھون کے دفتر نے ملاقات میں شامل ہونے والے رہنماؤں کے نام مانگے تھے۔

انہوں نے بتایا کہ 5 اکتوبر کو رہنماؤں کے ناموں کے ساتھ دوبارہ درخواست بھیجی گئی اور 7، 8 یا 9 اکتوبر کو ملاقات کے لیے وقت دینے کی درخواست کی گئی۔ وینوگوپال نے کہا، ’’اب تک ہمیں کوئی جواب نہیں ملا ہے۔ ہم کل تک انتظار کریں گے۔‘‘

کانگریس رہنما نے بی جے پی، وزیر اعظم نریندر مودی، مرکزی وزیر داخلہ امت شاہ اور چیف الیکشن کمشنر گیانیش کمار پر ہندوستانی جمہوریت میں ’’بدامنی پیدا کرنے‘‘ کا الزام لگایا۔ انہوں نے کہا، ’’یہ لوگ ہندوستانی جمہوریت کو تباہ کرنے والے ہیں اور ہم جمہوریت کے تحفظ کے لیے یہاں ہیں۔‘‘ وینوگوپال نے کہا کہ ملک کے ووٹروں کے حقوق اور جمہوریت کے تحفظ کے لیے یہ ’’کرو یا مرو‘‘ کی لڑائی ہے۔