دہرادون (اتراکھنڈ): سنٹرل ایڈمنسٹریٹو ٹریبونل (کیٹ) کی دہلی بینچ کے جسٹس راج ویر سنگھ ورما نے اتراکھنڈ کیڈر کے آئی ایف ایس افسر سنجیو چترویدی کی درخواست کی سماعت سے خود کو الگ کر لیا ہے۔ یہ درخواست اتراکھنڈ حکومت کے نومبر 2021 کے اس حکم کو چیلنج کرتے ہوئے دائر کی گئی تھی، جس کا تعلق آئی ایف ایس افسران کی اپریزل رپورٹ کے چینل سے تھا۔ 21 ستمبر کو جاری حکم میں کہا گیا، ’’کچھ عرصے تک معاملے کی سماعت کرنے کے بعد معزز رکن (جوڈیشل) جسٹس راج ویر سنگھ ورما نے اس معاملے کی سماعت سے خود کو الگ کر لیا ہے۔‘‘

تاہم حکم میں اس فیصلے کی کوئی خاص وجہ نہیں بتائی گئی ہے۔ چترویدی کی جانب سے فراہم کردہ معلومات کے مطابق، اس کے ساتھ ہی ان ججوں کی تعداد 17 ہوگئی ہے، جنہوں نے چترویدی سے متعلق مقدمات کی سماعت سے خود کو الگ کیا ہے۔ اب تک سپریم کورٹ کے دو جج، نینی تال ہائی کورٹ کے چار جج، کیٹ کے نو جج، جن میں اس کے چیئرمین بھی شامل ہیں، اور ضلعی عدلیہ کے دو جج چترویدی سے متعلق مقدمات سے الگ ہو چکے ہیں۔ اس سے قبل نینی تال ہائی کورٹ کے جسٹس آلوک ورما اور جسٹس رویندر میٹھانی نے چترویدی کی جانب سے کیٹ کے ارکان اور رجسٹری کے خلاف دائر توہین عدالت کے معاملے کی سماعت سے خود کو الگ کر لیا تھا۔

یہ معاملہ ہائی کورٹ کی جانب سے جاری کیے گئے اسٹے آرڈر پر عمل نہ کرنے کے الزام سے متعلق تھا۔ فروری 2024 میں نینی تال ہائی کورٹ کے جسٹس منوج تیواری نے چترویدی کی مرکزی ڈیپوٹیشن سے متعلق کابینہ کی تقرری کمیٹی (اے سی سی) سے دستاویزات طلب کرنے کے معاملے کی سماعت سے خود کو الگ کر لیا تھا۔ مئی 2023 میں نینی تال ہائی کورٹ کے جسٹس راکیش تھاپلیال نے بھی آل انڈیا انسٹی ٹیوٹ آف میڈیکل سائنسز (ایمس)، نئی دہلی میں چیف ویجیلنس افسر (سی وی او) کی حیثیت سے چترویدی کی مدت کار کے دوران بدعنوانی مخالف تحقیقات سے متعلق دستاویزات طلب کرنے کے معاملے کی سماعت سے خود کو الگ کر لیا تھا۔

اس سے پہلے فروری 2025 میں کیٹ کی ڈویژن بینچ کے جسٹس ہرویندر اوبرائے اور جسٹس بی آنند نے بغیر کوئی وجہ بتائے چترویدی کی اپریزل رپورٹ کو کم کرنے سے متعلق معاملے کی سماعت سے خود کو الگ کر لیا تھا۔ اپریل 2025 میں ایڈیشنل چیف جوڈیشل مجسٹریٹ (اے سی جے ایم) نیہا کشواہا نے کیٹ کے جج منیش گرگ کے خلاف چترویدی کی جانب سے دائر ہتک عزت کے مقدمے کی سماعت سے خود کو الگ کر لیا تھا۔ بتایا گیا کہ اس کی وجہ ان کے خاندان کے ایک رکن کے ایک دوسرے کیٹ جج کے ساتھ پہلے سے تعلقات تھے۔ چترویدی سے متعلق معاملات میں سپریم کورٹ میں بھی ججوں کے خود کو الگ کرنے کے واقعات سامنے آئے ہیں۔

نومبر 2013 میں اس وقت کے سپریم کورٹ جج جسٹس رنجن گوگوئی نے ہریانہ میں مبینہ بدعنوانی کے معاملات کی سی بی آئی جانچ کا مطالبہ کرنے والی چترویدی کی درخواست کی سماعت سے خود کو الگ کر لیا تھا۔ اگست 2016 میں اس وقت کے سپریم کورٹ جج جسٹس یو یو للت نے بھی اس معاملے سے خود کو الگ کر لیا تھا۔ دیگر معاملات میں مارچ 2019 میں کیٹ کے چیئرمین جسٹس ایل نرسمہا ریڈی، فروری 2021 میں کیٹ کے جج جسٹس آر این سنگھ، اور نومبر 2023 میں کیٹ کے جج جسٹس منیش گرگ اور چھبیلیندر راؤل کا چترویدی سے متعلق مقدمات کی سماعت سے خود کو الگ کرنا شامل ہے۔ جنوری 2025 میں کیٹ کے جج جسٹس راجیو جوشی نے بھی لوک پال سے متعلق چترویدی کی مرکزی ڈیپوٹیشن کے معاملے کی سماعت سے خود کو الگ کر لیا تھا۔