نئی دہلی: دہلی ہائی کورٹ نے جمعرات کو جنتر منتر پر یونیورسٹی گرانٹس کمیشن (یو جی سی) کے 2026 کے ضوابط کے خلاف مظاہرے کی اجازت نہ دینے کے دہلی پولیس کے فیصلے پر سوال اٹھایا۔ عدالت نے پولیس سے یہ بھی پوچھا کہ کیا پُرامن مظاہرے کے لیے کوئی دوسری جگہ فراہم کی جا سکتی ہے۔

کشتریہ کرنی سینا کے صدر راج شیکھاوت کی عرضی پر سماعت کے دوران درخواست گزار کے وکیل نے جسٹس سورن کانتا شرما کو بتایا کہ دہلی پولیس نے 20 ستمبر کو جنتر منتر پر مجوزہ مظاہرے کے لیے پہلے دی گئی اجازت منسوخ کر دی ہے۔ جسٹس شرما نے کہا، ’’میں حکومت سے پوچھ رہی ہوں کہ مکمل پابندی کیسے لگائی جا سکتی ہے؟ اگر آپ کوئی پابندی لگانا چاہتے ہیں، جس میں مظاہرے کی جگہ بھی شامل ہے، تو براہِ کرم مجھے بتائیں۔‘‘

ایڈیشنل سالیسٹر جنرل چیتن شرما نے کہا کہ جنتر منتر پر مظاہرے کی اجازت نہیں دی جا رہی ہے، کیونکہ یہ جگہ ایک ’’حساس علاقے‘‘ میں واقع ہے۔ انہوں نے عدالت کو بتایا کہ حکام نے فیصلہ کرتے وقت مظاہرے کی جگہ کے علاوہ سوشل میڈیا پر اس کی تشہیر، ’لائک‘ اور لوگوں کی ممکنہ شرکت جیسے پہلوؤں کو بھی مدنظر رکھا۔

سرکاری وکیل نے جسٹس شرما کو یقین دلایا کہ حکام سپریم کورٹ کے احکامات اور رہنما اصولوں کے مطابق کام کر رہے ہیں۔ تاہم، جسٹس شرما نے کہا کہ درخواست گزار کی درخواست پر فیصلہ کرنے کے لیے پولیس کو ہدایت دیتے وقت عدالت پہلے ہی ’’واضح طور پر‘‘ کہہ چکی تھی کہ مظاہرے کی اجازت کچھ شرائط کے ساتھ دی جا سکتی ہے۔

انہوں نے کہا کہ مظاہرہ صرف چند گھنٹوں کے لیے ہونا تھا اور مظاہرین کا کسی دوسری جگہ جانے کا کوئی منصوبہ نہیں تھا۔ عدالت نے کہا، ’’کیا اس طرح کا حکم دیا جا سکتا ہے؟ صرف اس لیے کہ آپ کو خدشہ ہے کہ کچھ لوگ آ سکتے ہیں؟ آپ انہیں کیسے روک سکتے ہیں؟ اگر آپ نہیں چاہتے کہ وہ جنتر منتر پر مظاہرہ کریں تو کوئی دوسری جگہ تجویز کریں۔‘‘ جسٹس شرما نے سرکاری وکیل سے کہا کہ وہ مظاہرے کے لیے کوئی متبادل جگہ فراہم کرنے کے سلسلے میں ہدایات لے کر عدالت میں واپس آئیں۔ عدالت نے معاملے کی اگلی سماعت کے لیے 22 ستمبر کی تاریخ مقرر کی ہے۔