گڑگاؤں: گڑگاؤں میں پیش آئے ہٹ اینڈ رن معاملے کے ملزم کی گرفتاری کے چند گھنٹے بعد متاثرہ خاتون کے والد نے پولیس کا شکریہ ادا کرتے ہوئے کہا کہ یہ محض حادثہ نہیں بلکہ قتل کی کوشش کا معاملہ ہے۔متاثرہ سیا کے والد نے صحافیوں سے گفتگو کرتے ہوئے کہا کہ پولیس نے مقدمہ درج کرکے اچھا قدم اٹھایا ہے تاہم ایف آئی آر کی تفصیلات ابھی ان کے علم میں نہیں آئی ہیں۔ انہیں معلوم ہوا ہے کہ پولیس نے ملزم کو راجستھان سے گرفتار کیا ہے۔ پولیس نے اچھا کام کیا ہے اور تعزیرات کی دفعہ 307 اور 554 شامل کی ہیں جو پہلے ہی شامل کی جانی چاہیے تھیں۔

انہوں نے کہا کہ وہ چاہتے ہیں کہ ملک کی کسی بھی خاتون کو اس طرح کے حادثے سے نہ گزرنا پڑے۔ لوگوں کو اپنی سوچ اور رویے میں تبدیلی لانی چاہیے۔ ہم گڑگاؤں گئے تھے اور تھانہ انچارج منوج کمار سے ملاقات کی تھی جنہوں نے یقین دلایا تھا کہ ملزم کو گرفتار کیا جائے گا اور اب اسے گرفتار کرلیا گیا ہے۔ یہ حادثے کا جرم نہیں ہے بلکہ قتل کی کوشش کا جرم ہے۔ انہوں نے تمام متعلقہ حکام کا شکریہ ادا کیا۔

دریں اثنا دوسہ صدر تھانے کے تھانہ انچارج یودھشٹر سنگھ نے کہا کہ تحقیقات اور ملزم سے متعلق تفصیلی معلومات گڑگاؤں پولیس کے حکام فراہم کریں گے۔انہوں نے بتایا کہ سہونہ سے ایک اسسٹنٹ سب انسپکٹر اور ایک ہیڈ کانسٹیبل پر مشتمل مشترکہ ٹیم پہنچی تھی۔ سماجی رابطوں کی ویب گاہوں پر گردش کرنے والی ویڈیو کے حوالے سے ٹیم نے مقامی پولیس کو بتایا کہ انہوں نے مبینہ ملزمان کلیان بینسلا اور لونییش کو آگرہ روڈ کے علاقے سے حراست میں لیا اور بعد ازاں انہیں گڑگاؤں لے گئے۔ تحقیقات اور ملزمان سے متعلق تفصیلی معلومات گڑگاؤں پولیس کے حکام فراہم کریں گے۔

کلیان بینسلا پر الزام ہے کہ اس نے اتوار کو گڑگاؤں کی گالف کورس روڈ پر موٹر سائیکل سوار سیا کو گاڑی سے ٹکر ماری تھی۔ گڑگاؤں پولیس نے ملزم کلیان بینسلا کو راجستھان کے دوسہ سے گرفتار کرلیا ہے۔ پولیس اسے جلد گڑگاؤں لائے گی۔دریں اثنا گڑگاؤں پولیس نے مقدمے میں بھارتیہ نیائے سنہتا کی دفعہ 109 بھی شامل کردی ہے۔

پولیس کے بیان کے مطابق گالف کورس روڈ پر ایک خاتون موٹر سائیکل سوار کو گاڑی سے ٹکر مارنے کی ویڈیو سماجی رابطوں کی ویب گاہوں پر وائرل ہونے کے بعد گڑگاؤں پولیس نے از خود نوٹس لیتے ہوئے سیکٹر 56 تھانے میں مقدمہ درج کیا۔ تفصیلی تحقیقات اور سی سی ٹی وی کیمروں کی ریکارڈنگ کا باریک بینی سے جائزہ لینے کے بعد بھارتیہ نیائے سنہتا کی دفعہ 109 شامل کی گئی ہے جو قتل کی کوشش سے متعلق ہے اور اس کے تحت 10 سال تک قید کی سزا ہوسکتی ہے۔

اس سے قبل سیکٹر 56 تھانے کے انچارج منوج کمار کی قیادت میں پولیس ٹیم نے جنوبی دہلی کے کالکاجی میں متاثرہ خاتون کی رہائش گاہ کا دورہ کیا تھا تاکہ اس کا تفصیلی بیان ریکارڈ کیا جاسکے۔ پولیس نے پہلے سے درج ایف آئی آر میں سخت دفعات بھی شامل کی تھیں۔