گاندھی نگر:گجرات حکومت کی 24 گھنٹے دستیاب ایئر ایمبولینس سروس نے 2022 میں آغاز کے بعد سے اب تک 98 پروازوں کے مشن مکمل کرلیے ہیں۔ ان میں 48 مشن مریضوں کو ایک جگہ سے دوسری جگہ منتقل کرنے، جبکہ 50 مشن اعضا کی پیوندکاری کے لیے انسانی اعضا کی منتقلی سے متعلق تھے۔ حکومت کی یہ پہل سنگین بیماریوں میں مبتلا مریضوں کو بروقت ماہر طبی سہولت فراہم کرنے اور اعضا کی پیوندکاری کے عمل کو تیز کرنے میں مدد دے رہی ہے۔

گجرات حکومت کے محکمہ شہری ہوابازی اور گجرات اسٹیٹ ایوی ایشن انفراسٹرکچر کمپنی لمیٹڈ (گج سیل) کے ذریعے چلائی جانے والی یہ سروس رعایتی نرخوں پر دستیاب ہے۔ نائب وزیر اعلیٰ اور محکمہ شہری ہوابازی کی ذمہ داری سنبھالنے والے ہرش سنگھوی کے مطابق، یہ سروس ریاست کے ہنگامی طبی نظام کا ایک اہم حصہ بن کر ابھری ہے۔

اس سے ملک بھر کے شہری فائدہ اٹھا سکتے ہیں۔ وزیر اعلیٰ بھوپیندر پٹیل کی قیادت میں شروع کی گئی اس پہل کا مقصد سنگین بیماریوں میں مبتلا مریضوں کو کم سے کم وقت میں مناسب اسپتال پہنچانا ہے۔ اس مقصد کے لیے حکومت نے وی ٹی۔ گج رجسٹریشن والا بیچ کرافٹ کنگ ایئر بی 200 طیارہ تعینات کیا ہے، جو چوبیس گھنٹے ایئر ایمبولینس کے مشن کے لیے دستیاب رہتا ہے۔ مریض کی حالت، طبی ضرورت اور سفر کے فاصلے کو دیکھتے ہوئے طیارے میں ڈاکٹروں، طبی عملے اور ضروری آلات کا انتظام کیا جاتا ہے۔

اس سروس کو چلانے میں 108 ایمرجنسی سروس کا اہم کردار ہے۔ ضرورت مند مریض کی شناخت ہونے کے بعد اس کا معاملہ گج سیل کے فلائٹ آپریشنز شعبے کو بھیجا جاتا ہے۔ اس کے بعد طیارے کے آپریشن، طبی ٹیم، ہوائی اڈے، سڑک کے ذریعے نقل و حمل کرنے والی ٹیم اور مریض کو داخل کرنے والے اسپتال کے درمیان تال میل قائم کیا جاتا ہے۔ ضرورت پڑنے پر اسپتال بھی براہِ راست ایئر ایمبولینس کی درخواست کرسکتے ہیں۔