اندور:مدھیہ پردیش کے وزیر اعلیٰ موہن یادو نے صنعت کاروں کو شہری علاقوں میں سرمایہ کاری کی دعوت دیتے ہوئے بدھ کو کہا کہ ریاستی حکومت شہروں کو سرمایہ کاری اور روزگار کے بڑے مراکز کے طور پر ترقی دے رہی ہے۔ یادو نے اندور میں منعقدہ ’مدھیہ پردیش اربن گروتھ کانکلیو 2.0‘ سے خطاب کرتے ہوئے کہا، ’’ریاستی حکومت شہری علاقوں کے لوگوں کو سستے مکانات فراہم کرنے کے ساتھ ساتھ شہروں کو سرمایہ کاری اور روزگار کے بڑے مراکز کے طور پر منظم انداز میں ترقی دے رہی ہے۔‘‘
انہوں نے اندور-اجین اور بھوپال کو میٹروپولیٹن علاقوں کے طور پر ترقی دینے کے منصوبوں کا ذکر کرتے ہوئے کہا کہ نجی شعبے کی سرمایہ کاری سے شہری بنیادی ڈھانچے کی ترقی، رہائش اور قابل تجدید توانائی سمیت مختلف شعبوں میں نئے مواقع پیدا ہوں گے۔ وزیر اعلیٰ نے امید ظاہر کی کہ اندور-بھوپال-جبل پور صنعتی راہداری کے منصوبے سے ریاست میں تقریباً 1 لاکھ کروڑ روپے کی سرمایہ کاری آئے گی۔ انہوں نے کہا کہ ریاستی حکومت نے ’ملکیت کے حقوق کے ریکارڈ کی تیاری اور رجسٹریشن اسکیم 2026‘ شروع کی ہے۔ اس کے تحت دیہی علاقوں کے لوگوں کی تقریباً 50 لاکھ نجی جائیدادوں کی مفت رجسٹریشن کی جائے گی۔
وزیر اعلیٰ نے کہا کہ ان جائیدادوں کی رجسٹریشن کے بعد دیہی علاقوں کے لوگ ان کی بنیاد پر بینکوں سے قرض حاصل کر سکیں گے، جس سے معاشی سرگرمیوں میں تیزی آئے گی۔ کانکلیو کے دوران ریاستی حکومت کے افسران نے شہروں کے صاف ستھرے ماحول، مضبوط بنیادی ڈھانچے اور صنعت کاروں کے لیے پرکشش پالیسیوں کا ذکر کرتے ہوئے سرمایہ کاروں کو ریاست میں سرمایہ لگانے کی دعوت دی۔
اس کانفرنس میں اندور اقتصادی خطے (آئی ای آر) کے لیے نیتی آیوگ کا منصوبہ پیش کیا گیا۔ اس کے علاوہ بھوپال اور اندور کی کاروباری ذمہ داری اور پائیداری سے متعلق رپورٹ (بی آر ایس آر) بھی پیش کی گئی۔ کانفرنس میں شہری رہائش اور منصوبہ بندی، آبی وسائل کے انتظام، عمارتوں کی تعمیر اور ان سے متعلق دیگر شعبوں کی پالیسیوں کے مسودے بھی جاری کیے گئے۔
