نئی دہلی: ہندوستان کے چیف جسٹس سوریا کانت نے ہفتہ کو کہا کہ بچوں میں منشیات کے استعمال کے مسئلے کو صرف صحت عامہ سے متعلق تشویش کے طور پر نہیں دیکھا جانا چاہیے بلکہ یہ بچوں کے تحفظ کا بھی اہم مسئلہ ہے۔

جسٹس سوریا کانت نے یہاں بہار لوک بھون میں ’منشیات سے آگے بچپن: تحفظ، دیکھ بھال اور بحالی‘ کے موضوع پر ’پاٹلی پترا پرگیہ پروَاہ‘ لیکچر دیتے ہوئے ’لینسیٹ‘ کی ایک حالیہ تحقیق کا حوالہ دیا۔ انہوں نے کہا کہ اس تحقیق کے مطابق ہندوستان میں ہر پانچ میں سے کم از کم ایک نوجوان کے منشیات کے استعمال کے درمیانے سے زیادہ خطرے میں ہونے کا اندازہ ہے۔

تاہم چیف جسٹس نے کہا کہ صرف اعداد و شمار سے اس مسئلے کی مکمل تصویر سامنے نہیں آتی۔ انہوں نے کہا، ’’ہر اعداد و شمار کے پیچھے ایک بچہ ہے اور ہر بچے کے حالات دوسرے بچے سے مختلف ہوتے ہیں۔ بچوں کو خطرے کی صورتحال تک پہنچانے والے حالات الگ الگ ہوتے ہیں، اس لیے ان سے نمٹنے کے طریقے بھی ان اختلافات کو مدنظر رکھتے ہوئے طے کیے جانے چاہئیں۔‘‘