نئی دہلی، قومی راجدھانی دہلی میں پیر کی صبح موسلادھار بارش اور گرج چمک کے ساتھ دن کا آغاز ہوا، جس سے موسم میں تبدیلی محسوس کی گئی اور درجہ حرارت میں بھی کمی آئی۔

محکمہ موسمیات ہند (آئی ایم ڈی) نے پیش گوئی کی ہے کہ اگلے دو سے تین گھنٹوں کے دوران دہلی اور قومی راجدھانی خطے (این سی آر) میں گرج چمک کے ساتھ درمیانی سے شدید بارش ہونے کا امکان ہے۔

تاہم، محکمہ موسمیات کے مطابق آئندہ چھ دنوں کے دوران دہلی میں جزوی طور پر ابر آلود آسمان رہنے اور بارش نہ ہونے کی پیش گوئی کی گئی ہے۔ آنے والے دنوں میں زیادہ سے زیادہ درجہ حرارت 31 سے 35 ڈگری سیلسیس کے درمیان رہنے کا امکان ہے۔

موسلادھار بارش کے باعث وسطی دہلی میں کرول باغ کے قریب واقع جھانڈے والان مندر کے علاقے میں پانی جمع ہوگیا، جس سے مقامی لوگوں کو پریشانی کا سامنا کرنا پڑا۔

محکمہ موسمیات کی جانب سے اتوار کی شام جاری سات روزہ پیش گوئی کے مطابق، 13 اکتوبر کو زیادہ سے زیادہ درجہ حرارت 32 سے 34 ڈگری سیلسیس اور کم سے کم درجہ حرارت 23 سے 25 ڈگری سیلسیس کے درمیان رہنے کا امکان ہے۔ 14 اکتوبر کو زیادہ سے زیادہ درجہ حرارت بڑھ کر 33 سے 35 ڈگری سیلسیس تک پہنچ سکتا ہے، جبکہ کم سے کم درجہ حرارت 23 سے 25 ڈگری سیلسیس رہنے کی توقع ہے۔

15 اکتوبر کو زیادہ سے زیادہ درجہ حرارت 31 سے 33 ڈگری سیلسیس اور کم سے کم درجہ حرارت 23 سے 25 ڈگری سیلسیس رہنے کی پیش گوئی کی گئی ہے۔ وہیں، 16 اکتوبر کو زیادہ سے زیادہ درجہ حرارت 32 سے 34 ڈگری سیلسیس اور کم سے کم درجہ حرارت 22 سے 24 ڈگری سیلسیس کے درمیان رہ سکتا ہے۔

17 اکتوبر کو بھی زیادہ سے زیادہ درجہ حرارت 32 سے 34 ڈگری سیلسیس اور کم سے کم درجہ حرارت 22 سے 24 ڈگری سیلسیس رہنے کا امکان ہے۔ ان تمام دنوں میں جزوی طور پر ابر آلود آسمان رہنے اور بارش نہ ہونے کی پیش گوئی کی گئی ہے۔

دریں اثنا، محکمہ موسمیات نے 11 اکتوبر کے لیے خبردار کیا تھا کہ بارش کے باعث ٹریفک کی رفتار متاثر ہوسکتی ہے، گاڑیوں کے حادثات کا خطرہ بڑھ سکتا ہے اور نشیبی علاقوں نیز سڑکوں پر پانی جمع ہونے کی صورت حال پیدا ہوسکتی ہے۔

محکمہ نے مسافروں کو مشورہ دیا تھا کہ وہ منزل کے لیے روانہ ہونے سے پہلے ٹریفک کی صورت حال معلوم کرلیں، ٹریفک سے متعلق ہدایات پر عمل کریں اور ان علاقوں سے گزرنے میں احتیاط برتیں جہاں بارش کے دوران اکثر پانی جمع ہوجاتا ہے۔

آئی ایم ڈی کے مطابق، گزشتہ 24 گھنٹوں کے دوران دہلی میں زیادہ سے زیادہ درجہ حرارت میں ایک سے دو ڈگری سیلسیس کی کمی درج کی گئی، جبکہ کم سے کم درجہ حرارت میں کوئی نمایاں تبدیلی نہیں ہوئی۔ اس دوران کم سے کم درجہ حرارت 21 سے 24 ڈگری سیلسیس اور زیادہ سے زیادہ درجہ حرارت 30 سے 32 ڈگری سیلسیس کے درمیان ریکارڈ کیا گیا۔