نئی دہلی: دہلی پولیس نے چیف الیکشن کمشنر گیانیش کمار کے استعفے کے مطالبے کو لے کر جنتر منتر پر احتجاج کرنے کے معاملے میں ہفتہ کو تین ایف آئی آر درج کیں۔ احتجاج میں طلبہ تنظیموں، سیاسی جماعتوں اور شہری تنظیموں کے کارکن شامل تھے۔ پولیس کے ایک سینئر افسر نے بتایا کہ دو ایف آئی آر پارلیمنٹ اسٹریٹ تھانے اور ایک ایف آئی آر کناٹ پلیس تھانے میں درج کی گئی ہے۔ ان میں بھارتیہ نیائے سنہتا (بی این ایس) کی دفعہ 223 کے تحت سرکاری ملازم کی جانب سے قانونی طور پر جاری کیے گئے حکم کی نافرمانی کا الزام عائد کیا گیا ہے۔ افسر کے مطابق ایف آئی آر میں کسی شخص یا تنظیم کو ملزم کے طور پر نامزد نہیں کیا گیا ہے۔

تاہم، ان میں ان منتظمین اور تنظیموں کی تفصیلات دی گئی ہیں جنہوں نے احتجاج کی اپیل کی تھی یا اس میں حصہ لیا تھا۔ جمعہ کو طلبہ تنظیموں، سیاسی جماعتوں کے رہنماؤں اور شہری تنظیموں کے کارکنوں نے ووٹر لسٹوں کی خصوصی گہری نظرثانی (ایس آئی آر) سے متعلق الزامات کے درمیان گیانیش کمار کے استعفے کا مطالبہ کرتے ہوئے جنتر منتر پہنچنے کی کوشش کی تھی۔

ایف آئی آر میں ان الزامات پر الیکشن کمیشن کا موقف اور اس کی جانب سے دیے گئے جوابات کی تفصیلی وضاحت نہیں کی گئی ہے۔ پولیس نے کہا کہ مظاہرین نے بھارتیہ ناگرک سرکشا سنہتا (بی این ایس ایس) کی دفعہ 163 کے تحت نئی دہلی ضلع میں نافذ امتناعی احکامات کی خلاف ورزی کی۔ پولیس کے مطابق عوامی تحفظ، امن و قانون برقرار رکھنے اور ٹریفک کی روانی کو یقینی بنانے کے لیے احتجاج سے قبل یہ احکامات جاری کیے گئے تھے۔ دفعہ 163 کے تحت پیشگی تحریری اجازت کے بغیر پانچ یا اس سے زیادہ افراد کے جمع ہونے، جلوس نکالنے اور احتجاج کرنے پر پابندی تھی۔

جمعہ کو پولیس اور نیم فوجی دستوں کے اہلکاروں نے بڑی تعداد میں لوگوں کو احتجاج کی جگہ تک پہنچنے سے روک دیا۔ جنتر منتر اور آس پاس کے علاقوں سے تقریباً ایک ہزار افراد کو حراست میں لیا گیا، جن میں سے کئی لوگوں کو بعد میں رہا کردیا گیا۔ حراست میں لیے گئے افراد میں عام آدمی پارٹی کے رہنما سوربھ بھاردواج، آتشی، سنجے سنگھ، کلدیپ کمار، جرنیل سنگھ اور سنجیو جھا، آل انڈیا اسٹوڈنٹس ایسوسی ایشن (آئسا) کی قومی صدر نہا بورا، شہری حقوق کے کارکن یوگیندر یادو، راشٹریہ جنتا دل کے رکن پارلیمنٹ منوج جھا، بھارتیہ کمیونسٹ پارٹی کے راجیہ سبھا رکن پی. سندیش، انڈین یوتھ کانگریس کے صدر ادے بھانو چب، این ایس یو آئی کے قومی صدر ونود جاکھڑ اور ڈیموکریٹک یوتھ فیڈریشن آف انڈیا (ڈی وائی ایف آئی) کے قومی صدر اے. اے. رحیم شامل تھے۔