جمعہ کی دوپہر بک مائی شو نے بھی ایک بیان جاری کرکے تصدیق کی کہ کنسرٹ طے شدہ پروگرام کے مطابق منعقد ہوگا۔بک مائی شو کے بیان میں کہا گیا ہے کہ دلجیت دوسانجھ کے ’اورا انڈیا ٹور‘ کے تحت 30 اکتوبر کو نئی دہلی میں ہونے والے کنسرٹ کی منسوخی سے متعلق خبریں درست نہیں ہیں۔ تقریب کی اجازت عارضی طور پر روک دی گئی تھی نہ کہ اسے منسوخ کیا گیا تھا۔ دونوں باتوں میں فرق کو سمجھنا ضروری ہے۔

بیان کے مطابق تہواروں کے موسم اور اس دوران سکیورٹی کے حوالے سے بڑھتی ہوئی احتیاط کے پیش نظر دہلی پولیس نے کنسرٹ کے منتظمین بک مائی شو لائیو سے اضافی حفاظتی انتظامات کرنے کو کہا تھا۔ ان میں سکیورٹی کے ساتھ ٹریفک اور بھیڑ کو منظم کرنے کے اقدامات بھی شامل تھے۔بک مائی شو لائیو نے دہلی پولیس کے ساتھ خوش گوار ماحول میں میٹنگ کی اور ایک تفصیلی منصوبہ پیش کیا۔ کمپنی نے سکیورٹی اور ٹریفک سے متعلق تمام شرائط پر عمل کرنے کی یقین دہانی بھی کرائی۔ اس کے بعد کنسرٹ کی اجازت پر دوبارہ غور کیا گیا اور منظوری دے دی گئی۔

بیان میں مزید کہا گیا کہ بک مائی شو لائیو دہلی پولیس کے ساتھ مل کر اس بات کو یقینی بنانے کے لیے پرعزم ہے کہ کنسرٹ میں آنے والے افراد کے ساتھ ساتھ مقامی مسافروں کو بھی بہتر سہولت فراہم ہو۔دلجیت دوسانجھ کے مداح قومی دارالحکومت میں ان کی براہ راست پرفارمنس دیکھنے کے لیے بے صبری سے انتظار کر رہے ہیں۔ نوجوان نسل میں بے حد مقبول دلجیت دنیا کے کئی بڑے مقامات پر اپنی پرفارمنس پیش کر چکے ہیں۔ ان میں نیویارک کا میڈیسن اسکوائر گارڈن اور لندن کا ویمبلی اسٹیڈیم شامل ہیں۔ وہ ویمبلی اسٹیڈیم میں مرکزی فنکار کے طور پر پرفارم کرنے اور وہاں کے تمام ٹکٹ فروخت ہونے کا اعزاز حاصل کرنے والے پہلے پنجابی فنکار بھی بنے تھے۔