نئی دہلی: دہلی ہائی کورٹ نے جمعہ کو دہلی یونیورسٹی اسٹوڈنٹس یونین (ڈوسو) انتخابات کے نتائج کے اعلان کے بعد فتح کے جلوس نکالنے پر مکمل پابندی عائد کرنے کا حکم دیا۔ عدالت نے تمام طلبہ تنظیموں اور امیدواروں سے یہ بھی جواب طلب کیا کہ انتخابی مہم کے دوران ہونے والے نقصان کے لیے ان پر جرمانہ کیوں نہ عائد کیا جائے۔ چیف جسٹس ڈی کے اپادھیائے اور جسٹس تیجس کاریا کی بنچ نے یہ ہدایت دیتے ہوئے کہا کہ ڈوسو انتخابات کے دوران لنگدوہ کمیٹی کی سفارشات کی بار بار اور کھلے عام خلاف ورزی کی گئی ہے۔ جمعہ کو دہلی یونیورسٹی کے کیمپس میں ووٹنگ جاری تھی، جبکہ ووٹوں کی گنتی ہفتہ کو کی جائے گی۔

عدالت نے کہا، ’’طلبہ، امیدواروں اور طلبہ تنظیموں کی جانب سے بار بار کی جانے والی خلاف ورزیوں کو دیکھتے ہوئے ہم نہ صرف قواعد کی خلاف ورزی کرنے والے طلبہ بلکہ طلبہ تنظیموں پر بھی جرمانہ عائد کرنے کی تجویز رکھتے ہیں۔‘‘ بنچ نے کہا کہ طلبہ تنظیمیں اور طلبہ جواب داخل کرکے بتائیں کہ ان پر مالی جرمانے کا بوجھ کیوں نہ ڈالا جائے۔ عدالت نے گزشتہ تجربات کا حوالہ دیتے ہوئے حکم دیا کہ نتائج کے اعلان کے بعد امیدواروں، طلبہ، حامیوں یا کسی بھی دوسرے شخص کی جانب سے نہ صرف دہلی کی سڑکوں بلکہ یونیورسٹی کیمپس اور ہاسٹل کے اندر بھی کوئی فتح کا جلوس نہیں نکالا جائے گا۔

عدالت نے کہا کہ فتح کے جلوس روکنے کی ذمہ داری دہلی پولیس کی ہوگی اور افسران کو کارروائی کرنے میں کسی طرح کی ’’جھجک‘‘ نہیں ہونی چاہیے، چاہے متعلقہ افراد ’’طلبہ‘‘ ہی کیوں نہ ہوں۔ بنچ نے واضح کیا کہ حکم کی خلاف ورزی کی صورت میں فوجداری اور انتظامی کارروائی کے ساتھ ساتھ عدالت کی توہین کی کارروائی بھی کی جائے گی۔

چیف جسٹس اپادھیائے نے کہا، ’’پولیس افسران کو جھجکنا نہیں چاہیے۔ انہیں صرف اس لیے کسی طرح کا دباؤ محسوس نہیں کرنا چاہیے کہ سامنے والے طلبہ ہیں۔ مجھے یہ کہتے ہوئے افسوس ہے کہ وہ طلبہ نہیں ہیں۔‘‘ انہوں نے سوال کیا، ’’کیا ہتھیار لہرانے والے کسی بھی شخص کو طالب علم کہا جا سکتا ہے؟ وہ لگژری گاڑیوں کے قافلے میں گھومتے ہیں۔ انہیں یہ پیسہ کہاں سے ملتا ہے؟‘‘ چیف جسٹس نے کہا کہ ایسے افراد حقیقی طلبہ کو ملنے والی سہولتوں پر قبضہ کر رہے ہیں۔

انہوں نے کہا، ’’اور یہ طلبہ تنظیمیں کیا کر رہی ہیں، مجھے نہیں معلوم۔‘‘ عدالت نے دوبارہ واضح کیا کہ لنگدوہ کمیٹی کی رپورٹ اور ڈوسو انتخابات کے انعقاد سے متعلق دہلی ہائی کورٹ اور سپریم کورٹ کے احکامات کی خلاف ورزی نہ ہو، یہ یقینی بنانے کے لیے ہر ممکن قدم اٹھانا دہلی پولیس اور دہلی یونیورسٹی انتظامیہ کی ذمہ داری ہے۔ عدالت وکیل پرشانت منچندا کی عرضی پر سماعت کر رہی تھی۔ عرضی میں الزام لگایا گیا تھا کہ بدھ کو کچھ لوگوں نے دہلی یونیورسٹی کے نارتھ کیمپس کے علاقے میں خلل پیدا کیا اور پروفیسروں اور طلبہ کے ساتھ مارپیٹ کی گئی۔ ڈوسو انتخابات سے متعلق منچندا کی عرضی عدالت میں زیر التوا ہے۔

انہوں نے دعویٰ کیا کہ انہیں اساتذہ اور طلبہ کی جانب سے پیغامات موصول ہوئے، جن میں کہا گیا تھا کہ ’’بندوقوں کا استعمال کیا گیا ہے اور پورے کیمپس پر ایک طرح سے قبضہ کر لیا گیا ہے۔‘‘ دہلی پولیس نے جمعہ کو عدالت کو بتایا کہ قانون کی خلاف ورزی کے معاملے میں کارروائی کی گئی ہے، جس میں ایف آئی آر درج کرنا اور کچھ طلبہ کو گرفتار کرنا بھی شامل ہے۔ ایڈیشنل سالیسٹر جنرل چیتن شرما نے بتایا کہ 998 چالان جاری کیے گئے اور 30 کاریں ضبط کی گئیں۔ انہوں نے کہا کہ دہلی یونیورسٹی انتظامیہ نے ایک طالب علم کو معطل یا یونیورسٹی سے خارج کیا ہے اور کچھ طلبہ کو وجہ بتاؤ نوٹس بھی جاری کیے گئے ہیں۔

عدالت نے کہا کہ اسے وجہ بتاؤ نوٹس کے بارے میں معلومات نہیں ہیں، کیونکہ گزشتہ سال بھی ایسے معاملات میں کوئی مؤثر کارروائی نہیں ہوئی تھی۔ عدالت نے کہا کہ وہ اس بات پر کوئی تبصرہ نہیں کر رہی کہ دہلی یونیورسٹی باقاعدگی سے وجہ بتاؤ نوٹس جاری کرتی ہے یا نہیں، لیکن اگر نوٹس پر عمل نہیں ہوتا اور معاملات کو ان کے منطقی انجام تک نہیں پہنچایا جاتا تو اس کا کوئی فائدہ نہیں۔ عدالت نے کہا کہ سال در سال وجہ بتاؤ نوٹس جاری کیے جا رہے ہیں، لیکن صورتحال میں کوئی بہتری نہیں آ رہی ہے۔ بنچ نے کہا، ’’ذرا دیکھیے، انتخاب جیتنے کے بعد ایک طالب علم ایک استاد کو تھپڑ مار رہا ہے۔ اس کا تصور کون کر سکتا تھا؟ کسی بھی کامیابی کو آپ کو عاجزی سکھانی چاہیے۔‘‘

عدالت نے پولیس کو ہدایت دی کہ اس کی جانب سے شروع کی گئی فوجداری کارروائی کو منطقی انجام تک پہنچایا جائے۔ سماعت کے دوران عدالت نے پولیس سے یہ بھی وضاحت طلب کی کہ سکیورٹی فورسز کی تعیناتی کے باوجود دہلی یونیورسٹی کے کیمپس کے اندر اور آس پاس ہنگامہ آرائی اور بغیر نمبر پلیٹ والی گاڑیوں اور گاڑیوں کے قافلوں کو چلنے کی اجازت کیسے دی گئی۔ عدالت نے وکیل منچندا کو خلاف ورزیوں سے متعلق ریکارڈ مرتب کرنے کی ہدایت دی اور معاملے کو نومبر میں سماعت کے لیے فہرست میں شامل کر دیا۔