نئی دہلی: دہلی کی ایک عدالت نے عام آدمی پارٹی (آپ) کے رہنما امانت اللہ خان کے خلاف دہلی وقف بورڈ میں ملازمین کی بھرتی اور جائیدادوں کو لیز پر دینے میں مبینہ بے ضابطگیوں سے متعلق مرکزی تفتیشی بیورو (سی بی آئی) کے مقدمے میں اپنا فیصلہ منگل کو 28 نومبر تک کے لیے ملتوی کردیا۔

خصوصی جج دگ ونئے سنگھ نے فیصلے کا اعلان ٹال دیا۔ اس معاملے میں آخری بحث 17 اکتوبر کو مکمل ہوئی تھی۔ سی بی آئی نے اس مقدمے میں امانت اللہ خان، دہلی وقف بورڈ کے سابق چیف ایگزیکٹیو افسر (سی ای او) محبوب عالم اور 11 دیگر افراد کو ملزم بنایا ہے۔ امانت اللہ خان پر الزام ہے کہ دہلی وقف بورڈ کا چیئرمین رہتے ہوئے انہوں نے اپنے عہدے کا غلط استعمال کیا اور اپنے قریبی لوگوں اور رشتہ داروں کو مبینہ طور پر غیر قانونی طریقے سے ملازمتیں دیں۔