ممبئی: ممبئی ہائی کورٹ نے منگل کے روز امریکی شہری اور اداکار عمران خان کو غیر ملکی علاقائی رجسٹریشن دفتر (ایف آر آر او) کی جانب سے جاری کیے گئے اس نوٹس پر 2 نومبر تک روک لگا دی، جس میں انہیں 28 اکتوبر تک ہندوستان چھوڑنے کی ہدایت دی گئی تھی۔ عمران خان کے وکیل وینکٹیش دھونڈ نے 28 اکتوبر کی آخری تاریخ کا حوالہ دیتے ہوئے عدالت سے درخواست کی کہ اس وقت تک ان کے خلاف کوئی تعزیری کارروائی نہ کی جائے۔

اس پر ایڈیشنل سالیسٹر جنرل انیل سنگھ نے زبانی یقین دہانی کرائی کہ ان کے خلاف ایسی کوئی کارروائی نہیں ہوگی۔ چیف جسٹس مہیش چندر ترپاٹھی اور جسٹس ادویت سیٹھنا پر مشتمل بنچ نے کہا کہ وہ ایف آر آر او کے نوٹس کو چیلنج کرنے والی عمران خان کی عرضی پر 2 نومبر کو سماعت کرے گی۔

رپورٹ کے مطابق، چیف الیکشن کمشنر گیانیش کمار کے خلاف ہونے والے احتجاج میں شرکت کے بعد ایف آر آر او نے اداکار کو یہ نوٹس جاری کیا تھا۔ نوٹس میں انہیں 28 اکتوبر تک ہندوستان چھوڑنے کی ہدایت دی گئی تھی۔ منگل کو ہائی کورٹ میں اس عرضی پر سماعت ہونی تھی، لیکن ایف آر آر او کی جانب سے پیش ہونے والے سالیسٹر جنرل تشار مہتا نے مزید وقت مانگا۔ عمران خان کے وکیل نے دوبارہ درخواست کی کہ سماعت کی اگلی تاریخ تک کوئی تعزیری قدم نہ اٹھایا جائے، کیونکہ نوٹس میں ملک چھوڑنے کے لیے 28 اکتوبر کی مہلت مقرر کی گئی ہے۔ ایڈیشنل سالیسٹر جنرل انیل سنگھ کی زبانی یقین دہانی کے بعد عدالت نے اس معاملے کی سماعت 2 نومبر تک ملتوی کر دی۔