چھترپتی سنبھاجی نگر: کاکروچ جنتا پارٹی (کاجپا) کے بانی ابھیجیت دپکے نے منگل کو الزام لگایا کہ پارٹی کے کارکنوں کو پولیس کی جانب سے نوٹس دیے جا رہے ہیں، ان سے دہلی آنے جانے کے اخراجات کے ذرائع کے بارے میں سوال کیا جا رہا ہے اور 10 اکتوبر کو نئی دہلی کے جنتر منتر پر ہونے والے مجوزہ احتجاج میں شامل نہ ہونے کے لیے دباؤ ڈالا جا رہا ہے۔ مہاراشٹر کے سنبھاجی نگر شہر میں ایک پریس کانفرنس سے خطاب کرتے ہوئے دپکے نے اسے ’’آمریت‘‘ قرار دیا۔

بھارتیہ جنتا پارٹی (بی جے پی) کی قیادت والی حکومت کو نشانہ بناتے ہوئے انہوں نے دعویٰ کیا کہ ’’ایک ملک، ایک انتخاب‘‘ محض ایک نعرہ ہے، جبکہ اصل ارادہ ’’ایک ملک، ایک سیاسی جماعت‘‘ کا ہے۔ کاجپا نے چیف الیکشن کمشنر گیانیش کمار کے استعفے کے مطالبے کو لے کر 10 اکتوبر کو نئی دہلی کے جنتر منتر پر احتجاج کرنے کا اعلان کیا ہے۔ دپکے نے دعویٰ کیا کہ چندرپور پولیس نے کاجپا کارکنوں کو نوٹس جاری کرکے انہیں احتجاج میں شامل نہ ہونے کے لیے کہا ہے۔ انہوں نے کہا کہ پولیس نے دہلی جانے کے سفری اخراجات کے لیے رقم کے ذرائع کے بارے میں بھی سوال کیا ہے۔

دپکے نے کہا، ’’میں نے کئی بار کہا ہے کہ مہاراشٹر پولیس ملک کی بہترین پولیس ہے اور دہلی پولیس کو اس سے سیکھنا چاہیے۔ لیکن یہ افسوسناک ہے کہ چندرپور پولیس نے کاجپا کارکنوں کو نوٹس جاری کرکے انہیں جنتر منتر کے احتجاج میں شامل نہ ہونے کے لیے کہا۔ ان سے جنتر منتر تک سفر کے اخراجات کے ذرائع کے بارے میں بھی پوچھا گیا۔‘‘ انہوں نے سوال کیا کہ پولیس پہلے ہی یہ کیسے طے کر سکتی ہے کہ احتجاج پُرتشدد ہوگا۔ دپکے نے کہا، ’’پولیس نے یہ بھی کہا ہے کہ یہ تحریک ’پُرتشدد‘ ہونے والی ہے۔ پولیس کو اتنی جلدی کیسے معلوم ہوگیا کہ احتجاج پُرتشدد ہوگا؟

کیا انہوں نے پہلے ہی کوئی منصوبہ بنا لیا ہے؟‘‘ انہوں نے کاجپا کارکنوں کو سوشل میڈیا پر ایسی پوسٹیں نہ کرنے کی پولیس کی مبینہ ہدایت پر بھی سوال اٹھایا جن سے تشدد بھڑک سکتا ہے۔ دپکے نے کہا، ’’ہم مہاتما گاندھی اور بی آر امبیڈکر کی بات کرتے ہیں۔ کیا انہیں یہ پُرتشدد لگتا ہے؟‘‘ دپکے نے الزام لگایا، ’’مہاراشٹر پولیس دہلی پولیس جیسا برتاؤ کیوں کر رہی ہے؟ اگر کوئی شخص مہاراشٹر کے چندرپور سے دہلی جا رہا ہے تو انہیں اس سے کیا لینا دینا؟ چندرپور پولیس کا اس میں کیا کام ہے؟ کیا کوئی ایک ہزار یا 1500 روپے کا ٹکٹ نہیں خرید سکتا؟ یہ کیسا سوال ہے؟ یہ واضح طور پر آمریت ہے۔‘‘

دپکے نے 2 اکتوبر کو ممبئی کے شیواجی پارک میں ایک بڑے احتجاج کی قیادت کی تھی۔ اس کے بعد انہوں نے گزشتہ ہفتے اعلان کیا تھا کہ اگر چیف الیکشن کمشنر گیانیش کمار استعفیٰ نہیں دیتے ہیں تو 10 اکتوبر کو دہلی کے جنتر منتر پر ایک اور احتجاج کیا جائے گا۔ اپوزیشن جماعتیں ووٹر فہرستوں کی خصوصی گہری نظرثانی (ایس آئی آر) کے عمل میں مبینہ بے ضابطگیوں اور تین رکنی الیکشن کمیشن کے اندر اختلافات کی خبروں کو لے کر مہم چلا رہی ہیں۔ تاہم، الیکشن کمیشن نے اپنے ارکان کے درمیان اختلافات کی خبروں کو مسترد کرتے ہوئے کہا ہے کہ ایس آئی آر سے متعلق تمام فیصلے اتفاق رائے سے لیے گئے ہیں۔