بجٹ 2027-28: نرملا سیتارمن کی اسٹارٹ اپ شعبے کے نمائندوں سے مشاورت

Story by  PTI | Posted by  [email protected] | Date 17-11-2026
بجٹ 2027-28: نرملا سیتارمن کی اسٹارٹ اپ شعبے کے نمائندوں سے مشاورت
بجٹ 2027-28: نرملا سیتارمن کی اسٹارٹ اپ شعبے کے نمائندوں سے مشاورت

 



نئی دہلی: مرکزی وزیر خزانہ اور امورِ کارپوریٹ نرملا سیتارمن نے منگل کے روز آئندہ مرکزی بجٹ 2027-28 سے قبل مائیکرو، اسمال اینڈ میڈیم انٹرپرائزز (MSME) اور اسٹارٹ اپ ایکو سسٹم سے وابستہ متعلقہ فریقوں کے ساتھ بجٹ سے قبل چوتھی مشاورتی میٹنگ کی صدارت کی۔

وزارت خزانہ کے ایک بیان کے مطابق، اس اجلاس میں محکمہ اقتصادی امور (DEA)، محکمہ فروغِ صنعت و داخلی تجارت (DPIIT) اور وزارتِ مائیکرو، اسمال اینڈ میڈیم انٹرپرائزز (MSME) کے سکریٹریوں کے علاوہ حکومتِ ہند کے چیف اکنامک ایڈوائزر بھی شریک ہوئے۔

وزارت نے سوشل میڈیا پلیٹ فارم ’ایکس‘ پر ایک پوسٹ میں بتایا کہ مرکزی وزیر خزانہ نرملا سیتارمن نے نئی دہلی میں آئندہ مرکزی بجٹ 2027-28 کے حوالے سے MSME شعبے اور اسٹارٹ اپ ایکو سسٹم کے نمائندوں کے ساتھ چوتھی قبل از بجٹ مشاورتی میٹنگ کی صدارت کی۔ مرکزی بجٹ 2027-28 کی تیاریوں کے سلسلے میں وزیر خزانہ اس سے قبل مینوفیکچرنگ شعبے کے ماہرین اور صنعتی نمائندوں کے ساتھ تیسری مشاورتی میٹنگ کی صدارت بھی کر چکی ہیں۔

اس سالانہ مشاورتی عمل کا مقصد معیشت کے مختلف شعبوں سے تجاویز حاصل کرنا ہے، تاکہ حکومت بجٹ کی ترجیحات اور تجاویز کو بہتر انداز میں مرتب کرسکے۔ وزارت کی پوسٹ کے مطابق، اس میٹنگ میں محکمہ اقتصادی امور، محکمہ فروغِ صنعت و داخلی تجارت، وزارتِ کان کنی اور وزارتِ امورِ کارپوریٹ کے سکریٹریوں نے بھی شرکت کی۔

اس سے قبل پیر کے روز نرملا سیتارمن نے بجٹ سے قبل مشاورت کے پہلے دور کی صدارت کی تھی، جس میں محکمہ اقتصادی امور کے سکریٹری، چیف اکنامک ایڈوائزر اور دیگر سینئر افسران شریک ہوئے تھے۔ مرکزی بجٹ 2027-28 یکم فروری 2027 کو پیش کیے جانے کی توقع ہے، جبکہ ملک کی اقتصادی کارکردگی اور مستقبل کے معاشی امکانات کا جائزہ پیش کرنے والا اقتصادی سروے 29 یا 31 جنوری 2027 کو پیش کیے جانے کا امکان ہے۔

یہ مشاورتی اجلاس صنعتی نمائندوں اور اقتصادی ماہرین کو اپنی تجاویز پیش کرنے اور متعلقہ شعبوں کے مسائل اجاگر کرنے کا موقع فراہم کرتے ہیں، جس سے حکومت کو بجٹ سازی کے عمل میں مختلف شعبوں کے نقطۂ نظر کو شامل کرنے میں مدد ملتی ہے۔