بریت کے خلاف اپیل پر برج بھوشن سنگھ نے دہلی کی عدالت میں جواب داخل کردیا

Story by  PTI | Posted by  [email protected] | Date 20-11-2026
بریت کے خلاف اپیل پر برج بھوشن سنگھ نے دہلی کی عدالت میں جواب داخل کردیا
بریت کے خلاف اپیل پر برج بھوشن سنگھ نے دہلی کی عدالت میں جواب داخل کردیا

 



نئی دہلی: بھارتی کشتی فیڈریشن (ڈبلیو ایف آئی) کے سابق صدر برج بھوشن شرن سنگھ نے جنسی ہراسانی کے ایک معاملے میں انہیں بری کیے جانے کے مجسٹریٹ عدالت کے فیصلے کے خلاف 4 خاتون پہلوانوں کی جانب سے دائر اپیل پر جمعہ کو دہلی کی ایک عدالت میں اپنا جواب داخل کردیا۔ اس سے قبل خصوصی جج دگ وجے سنگھ نے برج بھوشن سنگھ کو نوٹس جاری کیا تھا۔ جج نے 28 اکتوبر کو سنگھ کے وکیل کو جواب داخل کرنے کا آخری موقع دیا تھا۔

برج بھوشن سنگھ جمعہ کو ذاتی طور پر عدالت میں حاضر ہوئے۔ عدالت نے ان کا جواب داخل کیے جانے کا نوٹس لیتے ہوئے پہلوانوں کی جانب سے دلائل سننے کے لیے 27 اور 28 نومبر کی تاریخیں مقرر کی ہیں، جبکہ برج بھوشن سنگھ کا موقف سننے کے لیے 5 اور 9 دسمبر کی تاریخیں طے کی گئی ہیں۔ عدالت پہلے ہی واضح کرچکی ہے کہ اس معاملے کی کارروائی بند کمرے میں ہوگی۔

پہلوانوں نے 25 ستمبر کو فوجداری اپیل دائر کرکے برج بھوشن سنگھ کو بری کیے جانے کے فیصلے کو چیلنج کیا تھا۔ واضح رہے کہ رواں سال 3 اگست کو مجسٹریٹ عدالت نے عالمی چیمپئن شپ میں تمغہ جیتنے والی ونیش پھوگاٹ سمیت 6 خاتون پہلوانوں کی شکایت پر درج جنسی ہراسانی کے معاملے میں ثبوتوں کی کمی کا حوالہ دیتے ہوئے بھارتیہ جنتا پارٹی (بی جے پی) کے سابق رکن پارلیمنٹ اور ڈبلیو ایف آئی کے سابق صدر برج بھوشن سنگھ کو بری کردیا تھا۔

پہلوانوں نے اپنی اپیل میں کہا ہے کہ برج بھوشن سنگھ کو بری کرنے کا فیصلہ قانون کے مطابق نہیں تھا۔ یہ فیصلہ ریکارڈ پر موجود شواہد کا واضح طور پر غلط اور یک طرفہ جائزہ لینے کی بنیاد پر کیا گیا۔ ان کے مطابق، فیصلے میں قیاس آرائیوں اور اندازوں سے کام لیا گیا اور قانون کے مسلمہ اور لازمی اصولوں کو بھی نظر انداز کیا گیا۔