بہار اب گھپلوں اور جرائم کے بجائے ترقی کے لیے جانا جاتا ہے: وزیر اعظم مودی

Story by  PTI | Posted by  [email protected] | Date 21-11-2026
بہار اب گھپلوں اور جرائم کے بجائے ترقی کے لیے جانا جاتا ہے: وزیر اعظم مودی
بہار اب گھپلوں اور جرائم کے بجائے ترقی کے لیے جانا جاتا ہے: وزیر اعظم مودی

 



ویشالی: وزیر اعظم نریندر مودی نے ہفتہ کے روز بہار میں اپوزیشن اتحاد راشٹریہ جنتا دل (آر جے ڈی) اور کانگریس پر سخت حملہ کرتے ہوئے کہا کہ قومی جمہوری اتحاد (این ڈی اے) کی حکومت میں ریاست اب گھپلوں اور جرائم کے بجائے ترقی اور سرمایہ کاری کے حوالے سے سرخیوں میں رہتی ہے۔ مودی نے ریاستی دارالحکومت پٹنہ سے تقریباً 50 کلومیٹر دور ویشالی ضلع کے جعفر پٹی میں ایک عوامی ریلی سے خطاب کرتے ہوئے یہ بات کہی۔ اس موقع پر انہوں نے گنگا پر تعمیر کیے گئے ’نتیش سیتو‘ سمیت 34 ہزار کروڑ روپے سے زیادہ کے ترقیاتی منصوبے قوم کے نام وقف کیے۔

وزیر اعظم نے مختصر خطاب کرتے ہوئے کہا کہ ان کے پاس وقت کم ہے اور انہیں پڑوسی ریاست اتر پردیش بھی جانا ہے۔ مودی نے کہا کہ اس پل کا نام جنتا دل (یونائیٹڈ) کے صدر نتیش کمار کے نام پر رکھا گیا ہے، جو بہار کے لیے ان کی خدمات کے اعتراف کی علامت ہے۔ نتیش کمار نے اپریل میں بی جے پی کی قیادت والی حکومت کی تشکیل کی راہ ہموار کرنے کے لیے وزیر اعلیٰ کے عہدے سے استعفیٰ دے دیا تھا۔ مودی نے کہا، ’’این ڈی اے کے اقتدار میں آنے کے بعد ریاست نے ایک طویل سفر طے کیا ہے۔

پہلے صرف گھپلوں اور جرائم کی بات ہوتی تھی، لیکن اب بہار سرمایہ کاری کی تجاویز اور کسی بھی قسم کی بدعنوانی کرنے والوں کے خلاف کی جانے والی کارروائیوں کے حوالے سے خبروں میں رہتا ہے۔‘‘ مرکزی وزیر چراغ پاسوان کے پارلیمانی حلقے حاجی پور میں منعقدہ اس ریلی میں مودی نے ان کے مرحوم والد رام ولاس پاسوان کی خدمات کو بھی یاد کیا۔ رام ولاس پاسوان کئی مرتبہ حاجی پور پارلیمانی حلقے کی نمائندگی کر چکے تھے۔ وزیر اعظم نے کانگریس کو بھی نشانہ بناتے ہوئے الزام لگایا کہ اس نے ’’غریبی ہٹاؤ‘‘ کے نعرے دے کر عوام کو گمراہ کیا۔ مرکز میں گزشتہ 12 برسوں سے این ڈی اے حکومت کے دور کا ذکر کرتے ہوئے مودی نے کہا کہ اس عرصے میں ’’50 کروڑ لوگ غربت کے چنگل سے باہر نکلے ہیں۔‘‘ وزیر اعظم روایتی انداز میں ریلی کے اسٹیج پر پہنچے۔ وہ ایک کھلی گاڑی میں سوار ہوکر آئے اور سر کے اوپر گمچھا لہرا کر سڑک کے دونوں جانب کھڑے لوگوں کا استقبال کیا۔

وزیر اعظم کے اس انداز سے پرجوش لوگوں نے زوردار نعرے بازی کی۔ وزیر اعظم کے ساتھ بہار کے وزیر اعلیٰ سمراٹ چودھری اور نائب وزیر اعلیٰ وجے کمار چودھری موجود تھے، جبکہ مرکزی وزیر اور مقامی رکن پارلیمنٹ چراغ پاسوان ان کے پیچھے کھڑے تھے۔ مودی گنگا ندی پر تعمیر کیے گئے عظیم الشان پل کا افتتاح کرنے کے بعد جعفر گڑھی میں واقع ریلی کے مقام پر پہنچے۔ مودی نے گورنر لیفٹیننٹ جنرل (ریٹائرڈ) سید عطا حسنین اور دیگر رہنماؤں کی موجودگی میں چھ لین والے پل پر نصب فیتہ کاٹ کر اس کا افتتاح کیا۔

اس کے بعد انہوں نے نو کلومیٹر سے زیادہ طویل اس پل پر کچھ دور تک پیدل چل کر اس کا جائزہ لیا۔ پل کے دونوں جانب بڑی تعداد میں لوگ اپنے پسندیدہ رہنما کی ایک جھلک دیکھنے کے لیے انتظار کر رہے تھے۔ وزیر اعظم نے ان کی جانب دیکھ کر استقبال کیا اور اپنے مخصوص انداز میں گمچھا لہرایا۔ اس پر وہاں موجود لوگوں نے ’مودی مودی‘ کے نعرے لگانے شروع کر دیے۔ وزیر اعظم کے ریلی کے مقام پر پہنچنے تک بھی نعرے بازی جاری رہی۔ گنگا ندی پر تعمیر کیے گئے اس پل کا نام ’نتیش سیتو‘ رکھا گیا ہے۔

اس کے ذریعے جنتا دل (یونائیٹڈ) کے قومی صدر نتیش کمار کی خدمات کو خراج تحسین پیش کیا گیا ہے، جنہوں نے اپریل میں وزیر اعلیٰ کے عہدے سے استعفیٰ دے کر ریاست میں پہلی مرتبہ بی جے پی کی قیادت والی حکومت کی تشکیل کی راہ ہموار کی تھی۔ قابل ذکر ہے کہ وزیر اعظم گزشتہ تقریباً دو برسوں سے بہار میں اپنی انتخابی ریلیوں کے مقامات پر کھلی گاڑیوں کے ذریعے پہنچتے رہے ہیں۔ گزشتہ سال ہونے والے اسمبلی انتخابات کے دوران وسیع انتخابی مہم کے وقت انہوں نے گمچھا لہرانے کے اپنے اس مخصوص انداز کو مزید مقبول بنایا تھا۔ اس سے قبل پٹنہ ہوائی اڈے پر جنتا دل (یونائیٹڈ) کے صدر نتیش کمار نے وزیر اعظم مودی کا استقبال کیا۔ دونوں رہنماؤں کے گرمجوشی سے گلے ملنے کی تصاویر سوشل میڈیا پلیٹ فارم ’ایکس‘ پر شیئر کرتے ہوئے مودی نے لکھا کہ نتیش کمار سے ملاقات کرکے انہیں بے حد خوشی ہوئی۔