نئی دہلی: الیکشن کمیشن نے سپریم کورٹ کو بتایا ہے کہ مغربی بنگال میں ووٹر لسٹوں کی خصوصی گہری نظرثانی (ایس آئی آر) کے تحت نام حذف کیے جانے یا شامل کیے جانے سے متعلق 37 لاکھ سے زیادہ اپیلیں اب بھی زیر التوا ہیں۔ الیکشن کمیشن نے اپنے جوابی حلف نامے میں کہا ہے کہ سپریم کورٹ کی ہدایت پر قائم کیے گئے ٹریبونلز نے اب تک دائر کی گئی 38.20 لاکھ اپیلوں میں سے صرف تقریباً 1.02 لاکھ اپیلوں کا ہی فیصلہ کیا ہے۔ چیف جسٹس آف انڈیا سوریا کانت، جسٹس جوی مالیا باغچی اور جسٹس وی موہنا کی بینچ نے 17 جولائی کو کانگریس کی مغربی بنگال یونٹ کی ایس آئی آر کمیٹی کے صدر پرسن جیت بوس کی درخواست پر سماعت کی تھی۔

درخواست میں ایس آئی آر کے دوران ووٹر لسٹ سے نام خارج کیے جانے والے ووٹروں کی جانب سے دائر دعووں اور اعتراضات کی اسمبلی حلقہ وار تفصیلات عام کرنے کی درخواست کی گئی تھی۔ عدالت نے اس معاملے پر الیکشن کمیشن سے جواب طلب کیا تھا۔ الیکشن کمیشن نے اپنے حلف نامے میں بتایا کہ ووٹر لسٹوں کی ایس آئی آر سے متعلق احکامات کے خلاف مجموعی طور پر 38,20,683 اپیلیں دائر کی گئی ہیں۔ ان میں سے 1,02,231 اپیلوں کا فیصلہ ہوچکا ہے، جبکہ 37,18,452 اپیلیں اب بھی زیر التوا ہیں۔ تاہم حلف نامے میں یہ الگ الگ تفصیل نہیں دی گئی کہ ان میں کتنی اپیلیں ووٹر لسٹ سے نام حذف کیے جانے کے خلاف اور کتنی نام شامل کیے جانے کے سلسلے میں دائر کی گئی ہیں۔

پرسن جیت بوس نے اپنی درخواست میں دعویٰ کیا تھا کہ مغربی بنگال میں ایس آئی آر کے گنتی کے مرحلے کے دوران 58 لاکھ سے زیادہ ووٹروں کے نام فہرست سے باہر کر دیے گئے تھے۔ ان کے مطابق دعوے اور اعتراضات داخل کرنے کے مرحلے میں نام شامل کرانے کے لیے فارم 6 اور 6 اے کے ذریعے 9.64 لاکھ درخواستیں موصول ہوئی تھیں، جبکہ نام حذف کرانے کے لیے فارم 7 کے ذریعے 99 ہزار سے زیادہ درخواستیں دی گئی تھیں۔

تاہم 28 فروری کو شائع ہونے والی حتمی ووٹر لسٹ میں صرف تقریباً 1.82 لاکھ نام شامل کیے گئے۔ سپریم کورٹ نے 25 اگست کو الیکشن کمیشن کو ہدایت دی تھی کہ ووٹر لسٹ سے نام حذف کیے جانے یا شامل کیے جانے کو چیلنج کرنے والی اپیلوں کے زیر التوا رہنے اور ان کے فیصلے سے متعلق اعداد و شمار پیش کیے جائیں۔ عدالت میں الیکشن کمیشن کی جانب سے پیش کیے گئے اعداد و شمار کے مطابق، مسودہ ووٹر لسٹ جاری ہونے کے بعد 17 دسمبر 2025 سے 7 اگست 2026 کے درمیان فارم 6 کے تحت 34.13 لاکھ درخواستیں دائر کی گئیں۔

فارم 6 ووٹر لسٹ میں نام شامل کرانے کے لیے مقررہ درخواست فارم ہے۔ اس تعداد میں پہلی مرتبہ ووٹر کے طور پر رجسٹریشن کے لیے درخواست دینے والے افراد کے ساتھ وہ ووٹر بھی شامل ہیں جن کے نام مسودہ ووٹر لسٹ کی نظرثانی کے دوران حذف کر دیے گئے تھے۔

سپریم کورٹ نے 24 اپریل کو اپیلیٹ ٹریبونلز سے کہا تھا کہ ایس آئی آر کے بعد ووٹر لسٹ سے نام حذف کیے جانے کے خلاف ایسی اپیلوں کو ترجیحی بنیاد پر سنا جائے جن میں فوری سماعت کی ضرورت ثابت ہوتی ہو۔ تقریباً 60 لاکھ دعووں اور اعتراضات کے نمٹارے کے لیے مغربی بنگال اور پڑوسی ریاستوں اڈیشہ اور جھارکھنڈ کے تقریباً 700 عدالتی افسران کو تعینات کیا گیا تھا۔ بعد میں سپریم کورٹ کی ہدایت پر کلکتہ ہائی کورٹ کے چیف جسٹس نے اپیلوں پر فیصلہ کرنے کے لیے 19 ٹریبونلز قائم کیے تھے۔ ان ٹریبونلز کی سربراہی مختلف ہائی کورٹس کے سابق چیف جسٹس اور جج کر رہے ہیں۔