نئی دہلی: سپریم کورٹ نے جمعہ کو بار کونسل آف انڈیا (بی سی آئی) سے کہا کہ وہ پانچ سالہ انٹیگریٹڈ قانون کے کورس میں داخلے کے لیے مقرر زیادہ سے زیادہ عمر کی حد ختم کرنے کے معاملے پر اپنا موقف واضح کرے۔ مارچ 2017 میں عدالت نے بی سی آئی کے اس فیصلے پر روک لگا دی تھی، جس کے تحت پانچ سالہ ایل ایل بی کورس میں داخلے کے لیے زیادہ سے زیادہ عمر 22 سال اور تین سالہ کورس کے لیے 45 سال مقرر کی گئی تھی۔

اس معاملے کی اگلی سماعت دو ہفتے بعد ہوگی۔ بی سی آئی نے اس سلسلے میں ضروری ہدایات حاصل کرنے کے لیے عدالت سے ایک ہفتے کا وقت مانگا ہے۔ سماعت کے دوران درخواست گزار رشبھ دگل کے وکیل نے سوال اٹھایا کہ کیا قانون کے کورسز میں داخلے کے لیے کم از کم تعلیمی اہلیت مقرر کرنے کا بی سی آئی کا اختیار داخلہ لینے کے خواہش مند امیدواروں پر زیادہ سے زیادہ عمر کی حد عائد کرنے کے لیے بھی استعمال کیا جا سکتا ہے؟

بی سی آئی نے عمر کی حد کا دفاع کرتے ہوئے کہا، ’’ہم نے عمر کی حد اس لیے مقرر کی ہے کیونکہ زیادہ تر پانچ سالہ قانون کے کورس رہائشی ہوتے ہیں۔‘‘ بی سی آئی نے یہ بھی کہا کہ عدالت مناسب عمر کی حد مقرر کر سکتی ہے۔ تاہم جسٹس باگچی نے سوال کیا کہ کیا کسی کورس کے رہائشی ہونے کی بنیاد پر داخلے کے لیے زیادہ سے زیادہ عمر کی حد مقرر کی جا سکتی ہے؟

جسٹس باگچی نے کہا، ’’تمام پانچ سالہ قانون کے کورس رہائشی نہیں ہوتے۔ کلکتہ یونیورسٹی کو ہی دیکھ لیجیے۔ زیادہ سے زیادہ عمر کی حد مقرر کرنے کے لیے یہ کوئی پیمانہ نہیں ہو سکتا۔‘‘ بی سی آئی نے کہا کہ عدالت اس معاملے میں مناسب حکم جاری کر سکتی ہے۔ بی سی آئی نے قانونی تعلیم کے ضوابط 2008 کی دفعہ 28 کے تحت پانچ سالہ انٹیگریٹڈ قانون کے کورس میں داخلے کے لیے عام زمرے کے امیدواروں کی زیادہ سے زیادہ عمر 20 سال اور درج فہرست ذات، درج فہرست قبائل اور پسماندہ طبقات کے امیدواروں کے لیے 22 سال مقرر کی تھی۔