ایودھیا: اتر پردیش کے ایودھیا کی ایک خصوصی عدالت نے رام مندر میں چڑھاوے کی مبینہ چوری کے معاملے میں منگل کو مزید تین ملزمان کی ضمانت کی درخواستیں مسترد کردیں۔ ملزمان کے وکیل کل شیکھر سنگھ نے ’پی ٹی آئی بھاشا‘ کو بتایا کہ خصوصی جج رجت ورما نے انوکَلپ مشرا، لَو کش مشرا اور کرونیش پانڈے کی ضمانت کی درخواستیں مسترد کیں۔

اس سے ایک روز قبل پیر کو عدالت نے اویناش شکلا، منیش کمار یادو اور رام شنکر مشرا کی ضمانت کی درخواستیں بھی خارج کردی تھیں۔ وکیل نے بتایا کہ دفاع کی جانب سے عدالت میں دلیل دی گئی کہ بدعنوانی سے متعلق دفعات اور سرکاری ملازم کی جانب سے اعتماد کی مجرمانہ خلاف ورزی سے متعلق دفعات اس معاملے میں لاگو نہیں ہوتیں، کیونکہ ملزمان سرکاری ملازم نہیں ہیں۔

دفاع نے یہ بھی دلیل دی کہ اگر ان دونوں دفعات کو مقدمے سے ہٹا دیا جائے تو باقی جرائم میں زیادہ سے زیادہ سات سال قید کی سزا کا انتظام ہے۔ وکیل کے مطابق ایسی صورت میں، کسی خاص وجہ کی عدم موجودگی میں ملزمان کو ضمانت دی جاسکتی ہے۔ وکیل نے مزید بتایا کہ پولیس نے اس معاملے میں ابھی تک چارج شیٹ بھی داخل نہیں کی ہے۔

عدالت نے دونوں فریقوں کی دلیلیں سننے کے بعد تینوں ملزمان کی ضمانت کی درخواستیں مسترد کردیں۔ انہوں نے بتایا کہ باقی دو ملزمان، سبھاش شریواستو اور راماشنکر یادو عرف ٹنّو یادو کی ضمانت کی درخواستوں پر بدھ کو سماعت ہوگی۔ یہ معاملہ رام مندر میں چڑھاوے کی مبینہ چوری سے متعلق ہے۔ اس سلسلے میں 25 جون کو ایف آئی آر درج کیے جانے کے بعد پولیس نے آٹھ ملزمان کو گرفتار کیا تھا۔