نئی دہلی: اداکارہ انوشکا شرما اور ان کے شوہر و کرکٹر وراٹ کوہلی اتوار کے روز ممبئی میں منعقدہ کرشن داس کے کیرتن میں شریک ہوئے۔ اس پروگرام کی ویڈیوز انٹرنیٹ پر گردش کر رہی ہیں۔ یہ پروگرام ممبئی کے ورلی علاقے میں واقع ڈوم، ایس وی پی اسٹیڈیم میں منعقد کیا گیا تھا۔

اس میں امریکہ کے معروف کیرتن گلوکار اور موسیقار کرشن داس نے اپنے ساتھی موسیقاروں کے ساتھ فن کا مظاہرہ کیا۔ ویڈیوز میں انوشکا شرما اور وراٹ کوہلی کو سامعین کی پہلی قطار میں بیٹھے دیکھا جا سکتا ہے۔ گلابی رنگ کا سوٹ پہنے انوشکا کیرتن کے دوران بھجن گاتی اور تالیاں بجاتی نظر آئیں، جبکہ وراٹ نے کالی ٹی شرٹ اور سفید پتلون پہن رکھی تھی۔ انوشکا شرما آخری بار 2018 میں ریلیز ہونے والی فلم ’زیرو‘ میں نظر آئی تھیں۔ اس فلم میں شاہ رخ خان اور کترینہ کیف نے بھی اداکاری کی تھی۔

اب وہ کرکٹر جھولن گوسوامی کی زندگی پر مبنی کھیلوں کی سوانحی فلم ’چکدا ایکسپریس‘ میں نظر آئیں گی۔ اس فلم کی شوٹنگ 2022 میں مکمل ہو گئی تھی، تاہم اس کی ریلیز کی تاریخ کا ابھی اعلان نہیں کیا گیا ہے۔ فلم کی ہدایت کاری پروسیت رائے نے کی ہے، جبکہ کلین سلیٹ فلمز کے بینر تلے کرنیش شرما نے اسے پروڈیوس کیا ہے۔ اس فلم میں انوشکا، جھولن گوسوامی کا کردار ادا کرتی نظر آئیں گی۔ جھولن گوسوامی بین الاقوامی کرکٹ کی تاریخ کی عظیم ترین اور تیز ترین خواتین گیند بازوں میں شمار ہوتی ہیں۔