سری نگر: جموں و کشمیر میں اس سال اپریل میں شروع کی گئی ’نشا مکت مہم‘ کے تحت منشیات کے کاروبار میں ملوث 4 ہزار سے زیادہ افراد کو گرفتار کیا گیا ہے۔ پولیس کے ڈائریکٹر جنرل نلین پربھات نے جمعرات کو یہ اطلاع دی۔ پولیس کے ڈائریکٹر جنرل نے یہاں ’رن فار یونٹی‘ میں شامل شرکا سے خطاب کرتے ہوئے بتایا کہ لیفٹننٹ گورنر منوج سنہا کی جانب سے 11 اپریل کو جموں سے اس مہم کا آغاز کیے جانے کے بعد پولیس نے منشیات اور نفسیاتی اثرات مرتب کرنے والے مادوں سے متعلق قانون (این ڈی پی ایس ایکٹ) کے تحت 3,257 مقدمات درج کیے ہیں۔

جموں و کشمیر کے پولیس سربراہ نے کہا کہ تقریباً 4 ہزار افراد کو گرفتار کیا گیا ہے، جبکہ 170 مقدمات میں سزائیں بھی ہو چکی ہیں۔ انہوں نے بتایا کہ 2,500 سے زیادہ مقدمات کا فیصلہ پہلے ہی کیا جا چکا ہے۔ پراپرٹی ضبط کرنے کے معاملے میں جموں و کشمیر اس وقت پورے ہندوستان میں پہلے مقام پر ہے، جہاں 288 جائیدادیں ضبط کی گئی ہیں۔ پربھات نے کہا کہ ضبط کی گئی جائیدادوں کی مالیت تقریباً 138 کروڑ روپے ہے، جبکہ 80 لاکھ روپے نقد بھی برآمد کیے گئے ہیں۔

پولیس ڈائریکٹر جنرل نے بتایا کہ 144 ملزمان کے خلاف منشیات اور نفسیاتی اثرات رکھنے والے مادوں کی غیر قانونی اسمگلنگ کی روک تھام کے قانون (پی آئی ٹی این ڈی پی ایس) کے تحت مقدمات درج کیے گئے ہیں۔ ان کے مطابق یہ تعداد ہندوستان کی کسی بھی ریاست یا مرکز کے زیر انتظام علاقے کے مقابلے میں سب سے زیادہ ہے۔

انہوں نے کہا کہ پولیس دہشت گردی مخالف کارروائیوں کے ذریعے ’دشمن پڑوسی‘ کے مبینہ ناپاک عزائم کو ناکام بنانے کے لیے مسلسل کام کر رہی ہے۔ ان کے مطابق ستمبر کا مہینہ پولیس کے لیے باعث فخر رہا، جس میں کارروائیوں کے محاذ پر کئی کامیابیاں حاصل کی گئیں۔ پربھات نے کہا کہ دہشت گردی مخالف کارروائیوں کے علاوہ جرائم کی روک تھام، مجرموں کا سراغ لگانے اور امن و قانون برقرار رکھنے کے میدان میں بھی اہم پیش رفت ہوئی ہے۔ ’نشا مکت یوا فار وکست بھارت سنکلپ ابھیان‘ کا مقصد نوجوانوں میں منشیات کے استعمال کا خاتمہ کرنا ہے۔