کانفرنس کے سائنسی پروگرام میں تقریباً 300 مقالے پیش کیے گئے۔ اس دوران 5 بین الاقوامی، 75 قومی اور 256 ریاستی سطح کے ماہرین نے اپنے خطبات پیش کیے۔ پروگرام کا ایک اہم حصہ نادر اور پیچیدہ امراضِ چشم کے معاملات میں لائیو سرجری کے مظاہرے تھے۔ ان مظاہروں کے ذریعے جدید جراحی تکنیکوں، طبی فیصلوں اور سرجری کے نتائج میں ہونے والی تازہ پیش رفت سے مندوبین کو آگاہ کیا گیا۔

کانفرنس کی افتتاحی تقریب میں اے ایم یو کی وائس چانسلر پروفیسر نعیمہ خاتون نے مہمانِ خصوصی کی حیثیت سے شرکت کی۔ ڈاکٹر چترا راما مورتی اور ڈاکٹر سنتوش جی ہوناور مہمانانِ اعزازی تھے۔

اس موقع پر پروفیسر نعیمہ خاتون نے ڈائمنڈ جوبلی کانفرنس کے انعقاد کے لیے علی گڑھ مسلم یونیورسٹی کا انتخاب کرنے پر یو پی اسٹیٹ آپتھلمولوجیکل سوسائٹی کے عہدیداران کا شکریہ ادا کیا۔ انہوں نے انسٹی ٹیوٹ آف آپتھلمولوجی کی علمی و تحقیقی خدمات کو سراہتے ہوئے کہا کہ ادارہ امراضِ چشم کی تعلیم اور مریضوں کی بہتر نگہداشت کے لیے اہم کردار ادا کر رہا ہے۔

کانفرنس کے دوران شعبۂ امراضِ چشم میں نمایاں خدمات انجام دینے والی شخصیات کو اعزازات سے بھی نوازا گیا۔ پروفیسر ایف اے جیلانی اور ڈاکٹر ریکھا گوئل کو ان کی طویل اور قابلِ قدر پیشہ ورانہ خدمات کے اعتراف میں یو پی اسٹیٹ آپتھلمولوجیکل سوسائٹی کے لائف ٹائم اچیومنٹ ایوارڈ سے سرفراز کیا گیا۔

علی گڑھ مسلم یونیورسٹی کے شعبۂ امراضِ چشم کے ڈاکٹر محمد ثاقب کو قرنیہ کی نگہداشت اور مغربی اتر پردیش میں قرنیہ کے اندھے پن کے خاتمے کے لیے ان کی کوششوں کے اعتراف میں سوسائٹی کے صدر کی جانب سے توصیفی ایوارڈ پیش کیا گیا۔ اسی طرح ایل وی پرساد آئی انسٹی ٹیوٹ حیدرآباد کے ڈاکٹر جاوید علی کو ان کی علمی اور پیشہ ورانہ خدمات کے لیے اعزاز سے نوازا گیا۔

آرگنائزنگ چیئرپرسن ڈاکٹر اجے سکسینہ نے مندوبین کا خیرمقدم کیا اور معزز مہمانوں کے تئیں اظہارِ تشکر کیا۔ کانفرنس کی آرگنائزنگ سکریٹری پروفیسر سیمیں ذکاء الرّب نے اس کے علمی مقاصد پر روشنی ڈالتے ہوئے کہا کہ یہ پلیٹ فارم ممتاز ماہرینِ امراضِ چشم کو سائنسی تبادلہ خیال، نئی تحقیق اور نگاہ کی بہتر نگہداشت کے شعبے میں ہونے والی پیش رفت سے روشناس کرانے کا اہم ذریعہ ہے۔

یہ کانفرنس یو پی اسٹیٹ آپتھلمولوجیکل سوسائٹی کے صدر ڈاکٹر ششانک کمار کی قیادت میں منعقد ہوئی۔ اس کے انعقاد میں سوسائٹی کے دیگر عہدیداران خصوصاً ڈاکٹر ابھیشیک چندرا، ڈاکٹر دیپک مشرا اور ڈاکٹر شالنی موہن نے بھی اہم تعاون کیا۔

کانفرنس میں نظریاتی مباحثوں کے ساتھ عملی مہارتوں کو فروغ دینے کے لیے ویٹ لیب ٹریننگ اور سرجیکل اسکل ٹرانسفر کورس کا بھی اہتمام کیا گیا۔ پروفیسر ایس ایم ذاکر کی نگرانی میں تقریباً 90 ماہرینِ امراضِ چشم کو عملی تربیت فراہم کی گئی۔ سائنسی پروگرام کی کوآرڈنیٹر ڈاکٹر ناہید اختر تھیں۔ اس پروگرام میں ماہرین کے خطبات، سائنسی نشستیں، سرجری کے مظاہرے اور تبادلہ خیال کے سیشن شامل تھے۔

کانفرنس کے انعقاد میں علی گڑھ مسلم یونیورسٹی کے انسٹی ٹیوٹ آف آپتھلمولوجی، گاندھی آئی ہاسپٹل اور علی گڑھ کے دیگر ماہرینِ امراضِ چشم نے مقامی آرگنائزنگ کمیٹی اور یو پی اسٹیٹ آپتھلمولوجیکل سوسائٹی کی قیادت کے ساتھ مل کر اہم کردار ادا کیا۔

اختتامی تقریب میں پروفیسر سیمیں ذکاء الرّب نے مہمانوں، سوسائٹی کے عہدیداران، قومی و بین الاقوامی ماہرین، مندوبین اور منتظمین کا شکریہ ادا کیا۔ انہوں نے کانفرنس کی کامیابی میں مقامی آرگنائزنگ کمیٹی کے اراکین کی خدمات کو بھی سراہا۔ ان میں ڈاکٹر اجے سکسینہ، پروفیسر عبد الوارث، ڈاکٹر ذیشان رئیس خان، ڈاکٹر ارچنا بھٹناگر، پروفیسر حنا کوثر، پروفیسر ایس ایم ذاکر، ڈاکٹر ناہید اختر، ڈاکٹر محمد ثاقب، ڈاکٹر احمد عبداللہ، ڈاکٹر محمد فراز، ڈاکٹر روی جین اور ڈاکٹر محبوب عالم سمیت دیگر اراکین شامل تھے۔

تین روزہ کانفرنس نے ماہرینِ امراضِ چشم کو جدید تحقیق، سرجری کی نئی تکنیکوں اور مریضوں کی نگہداشت کے بہتر طریقوں پر تبادلہ خیال کا موقع فراہم کیا۔