وجہ بتاؤ نوٹس سے پہلے سماعت کے معاملے پر سپریم کورٹ نے لوک پال سے جواب طلب کیا

Story by  PTI | Posted by  [email protected] | Date 18-11-2026
وجہ بتاؤ نوٹس سے پہلے سماعت کے معاملے پر سپریم کورٹ نے لوک پال سے جواب طلب کیا
وجہ بتاؤ نوٹس سے پہلے سماعت کے معاملے پر سپریم کورٹ نے لوک پال سے جواب طلب کیا

 



نئی دہلی: سپریم کورٹ نے بدھ کو دہلی ہائی کورٹ کے اس فیصلے کے خلاف دائر عرضی پر لوک پال سے جواب طلب کیا ہے، جس میں کہا گیا تھا کہ بدعنوانی کے خلاف کام کرنے والے ادارے لوک پال کے لیے کسی سرکاری ملازم کو تحقیقات کے سلسلے میں ’’وجہ بتاؤ نوٹس‘‘ جاری کرنے سے پہلے اپنا موقف پیش کرنے کا موقع دینا ضروری نہیں ہے۔ دہلی ہائی کورٹ نے 15 اپریل کو سرکاری ملازم چنمیجیت سین کی عرضی خارج کر دی تھی۔ انہوں نے ایک شکایت کے سلسلے میں لوک پال کے 25 فروری کے حکم اور اس کے بعد 27 فروری کو جاری کیے گئے وجہ بتاؤ نوٹس کو چیلنج کیا تھا۔

ہائی کورٹ نے اپنے فیصلے میں کہا تھا کہ لوک پال اور لوک آیکت قانون، 2013 کی دفعہ 20(3) کے تحت کوئی حتمی کارروائی کرنے سے پہلے متعلقہ سرکاری ملازم کو اپنا موقف پیش کرنے کا حق حاصل ہے، لیکن وجہ بتاؤ نوٹس جاری کرنے سے پہلے اسے سماعت کا موقع دینا ضروری نہیں ہے۔ قانون کی دفعہ 20(3) کے مطابق ابتدائی تحقیقات کی رپورٹ کا جائزہ لینے، متعلقہ سرکاری ملازم کو اپنا موقف پیش کرنے کا موقع دینے، الزامات کے بادی النظر میں درست ہونے یا نہ ہونے کا فیصلہ کرنے اور آئندہ کارروائی طے کرنے کے لیے لوک پال کے کم از کم 3 ارکان پر مشتمل بنچ کا ہونا ضروری ہے۔

چیف جسٹس سوریہ کانت، جسٹس جوئے مالیا باگچی اور جسٹس وی موہنا پر مشتمل سپریم کورٹ کی بنچ نے چنمیجیت سین کے وکیل کے دلائل کا نوٹس لیتے ہوئے لوک پال کو نوٹس جاری کیا۔ تاہم بنچ نے لوک پال کے سامنے چنمیجیت سین کے خلاف جاری کارروائی پر روک لگانے سے انکار کر دیا۔ عدالت نے کہا کہ اس معاملے کی اگلی سماعت ایک ہفتے بعد ہوگی۔ یہ کارروائی لوک پال کی ہدایت پر مرکزی تفتیشی بیورو (سی بی آئی) کی جانب سے کی گئی ابتدائی تحقیقات کی بنیاد پر شروع ہوئی تھی۔ سی بی آئی نے 27 جنوری کو اپنی ابتدائی تحقیقاتی رپورٹ پیش کی تھی۔

اس کے بعد لوک پال نے الزامات کا جائزہ لیا اور پایا کہ چنمیجیت سین کے خلاف لگائے گئے بعض الزامات بادی النظر میں درست معلوم ہوتے ہیں۔ اس کے بعد لوک پال نے عرضی گزار کو وجہ بتاؤ نوٹس جاری کیا، جس میں ان سے 2 الزامات پر جواب طلب کیا گیا اور قانون کی دفعہ 20(3) کے تحت اپنا موقف پیش کرنے کا موقع دیا گیا۔