نئی دہلی: ہندوؤں کی مذہبی رزمیہ داستان ’رامائن‘ پر مبنی فلم ’رامائن: پارٹ ون‘ نے دنیا بھر کے باکس آفس پر شاندار آغاز کیا ہے۔ فلم نے ریلیز کے پہلے ہی دن 155 کروڑ روپے کی مجموعی کمائی کی ہے۔ فلم کے پروڈیوسروں نے جمعہ کو یہ اطلاع دی۔ نتیش تیواری کی ہدایت کاری میں بنی یہ فلم 5 نومبر کو دنیا بھر کے سنیما گھروں میں ریلیز ہوئی۔ فلم میں رنبیر کپور نے بھگوان رام، سائی پلوی نے سیتا، یش نے راون اور روی دوبے نے لکشمن کا کردار ادا کیا ہے۔

فلم کے پروڈیوسروں نے ایک پریس ریلیز میں دعویٰ کیا کہ اس نے ہندوستانی سنیما کی تاریخ میں دیوالی سے پہلے ریلیز ہونے والی فلموں میں پہلے دن سب سے زیادہ کمائی کرنے کا ریکارڈ قائم کیا ہے۔ بیان میں کہا گیا، ’’دنیا بھر کے باکس آفس پر شاندار آغاز کرتے ہوئے ’رامائن‘ نے ریلیز کے پہلے دن 155 کروڑ روپے کی زبردست مجموعی کمائی کی ہے۔

اس کے ساتھ ہی یہ ہندوستانی سنیما کی تاریخ میں دیوالی سے پہلے ریلیز ہونے والی فلموں میں پہلے دن سب سے زیادہ کمائی کرنے والی فلم بن گئی ہے۔‘‘ پروڈیوسروں نے فلم کی کامیابی کا سہرا ناظرین کے پرجوش ردعمل کو دیا۔ ان کا کہنا تھا کہ دیوالی سے ٹھیک پہلے کا وقت عام طور پر فلموں کے لیے چیلنجنگ ہوتا ہے، کیونکہ تہوار کی تیاریوں اور لوگوں کے سفر کی وجہ سے سنیما گھروں میں ناظرین کی تعداد متاثر ہوتی ہے۔

اس کے باوجود فلم کے صبح کے ابتدائی شوز سے ہی سنیما گھروں میں ناظرین کی اچھی خاصی موجودگی دیکھنے کو ملی۔ ’رامائن: پارٹ ون‘ ہندوستانی رزمیہ داستان پر مبنی دو حصوں کی فلم کا پہلا حصہ ہے۔ اس فلم کو نمیت ملہوترا کے پرائم فوکس اسٹوڈیوز نے اداکار یش کی کمپنی مونسٹر مائنڈ کریشنز کے اشتراک سے تیار کیا ہے۔