.webp "شہزاد پونا والا نے ’رائز اینڈ فال‘ سیزن 2 کا خطاب جیت لیا، 35 لاکھ روپے کا انعام")
ممبئی: سیاسی رہنما شہزاد پونا والا نے ریئلٹی شو ’رائز اینڈ فال‘ کے دوسرے سیزن کا خطاب اپنے نام کر لیا ہے۔ انہوں نے ٹرافی کے ساتھ 35 لاکھ روپے کی انعامی رقم بھی حاصل کی۔ اداکارہ پرینکا چاہر چودھری پہلی رنر اَپ رہیں جبکہ ’بگ باس 8‘ کے فاتح گوتم گلاٹی نے تیسری پوزیشن حاصل کی۔جیت کے بعد خوشی کا اظہار کرتے ہوئے شہزاد پونا والا نے کہا کہ ’رائز اینڈ فال‘ کے دوسرے سیزن میں کامیابی کو الفاظ میں بیان کرنا ممکن نہیں ہے۔ یہ سفر آسان نہیں تھا۔ ٹاور کی بلندیوں سے لے کر بیسمنٹ کی غیر یقینی صورت حال تک انہیں مسلسل خود کو حالات کے مطابق ڈھالنا پڑا اور مشکلات کے باوجود آگے بڑھنا پڑا۔انہوں نے کہا کہ کئی مواقع پر انہیں شک و شبہات کا سامنا کرنا پڑا لیکن انہیں ہمیشہ یقین تھا کہ وہ کامیاب ہو سکتے ہیں۔ آج ٹرافی ہاتھ میں لے کر ان کا یہ یقین حقیقت میں بدل گیا ہے۔ یہ کامیابی ثابت کرتی ہے کہ عزم اور ثابت قدمی سے بڑی منزل حاصل کی جا سکتی ہے۔
شہزاد نے مزید کہا کہ انہیں اپنے فیصلوں اور مشکل حالات میں اپنے رویے پر فخر ہے۔ اس سفر کے دوران بننے والے رشتے، خوشگوار لمحات اور مقابلے کی یادیں اس پروگرام سے کہیں بڑھ کر ہیں۔ وہ ٹرافی اور ناقابل فراموش یادوں کے ساتھ گھر لوٹ رہے ہیں اور انہیں اطمینان ہے کہ انہوں نے اپنی پوری صلاحیت کے ساتھ مقابلے میں حصہ لیا۔انہوں نے پروگرام کے منتظمین، ایم ایکس پلیئر از پرائم ویڈیو اور بنجائے ایشیا کا بھی شکریہ ادا کیا جنہوں نے انہیں اس پلیٹ فارم پر اپنی صلاحیتیں دکھانے کا موقع فراہم کیا۔
پروگرام کا عظیم الشان اختتامی مرحلہ آخری چھ امیدواروں کی شاندار پرفارمنس سے شروع ہوا۔ اس کے بعد سابق امیدواروں کی واپسی نے تقریب کو یادگار بنا دیا۔ تاہم فارچیون فلور پیرامڈ مقابلے کے نتیجے میں نہاریکا تیواری پروگرام سے باہر ہو گئیں اور مقابلہ آخری پانچ امیدواروں تک محدود رہ گیا۔اس موقع پر ہرش گجرال نے اپنی مخصوص مزاحیہ انداز سے تقریب کو خوشگوار بنایا جبکہ امیدواروں کے اہل خانہ کی خصوصی شرکت نے اس میں جذباتی رنگ بھی شامل کیا۔
بعد ازاں ٹاور کی روشنیاں کرن پٹیل اور سورا بھاسکر کے لیے سرخ ہوگئیں اور وہ مقابلے سے باہر ہو گئے۔ اس طرح پرینکا چاہر چودھری، گوتم گلاٹی اور شہزاد پونا والا آخری مرحلے میں پہنچے۔خطاب کے فیصلے کے لیے آخری مرحلے میں ووٹنگ کا سہارا لیا گیا۔ جب تینوں امیدواروں کے درمیان فیصلہ برابر رہا تو باقی شرکا نے اپنا حتمی فیصلہ سنایا۔ اس طرح گوتم گلاٹی دوسرے رنر اَپ، پرینکا چاہر چودھری پہلی رنر اَپ جبکہ شہزاد پونا والا ’ایم ایکس اوریجنل رائز اینڈ فال‘ سیزن 2 کے فاتح اور آخری حکمراں قرار پائے۔
بنجائے ایشیا اور اینڈیمول شائن انڈیا کے بانی اور گروپ چیف ایگزیکٹو دیپک دھر نے کہا کہ پروگرام کا اختتام ان کے ادارے کے لیے اظہار تشکر کا ایک اہم موقع ہے۔ انہوں نے کہا کہ ناظرین کی جانب سے پروگرام کو ملنے والی محبت اور مختلف شخصیات کے حامل امیدواروں کی شرکت نے اسے خاص بنایا۔ امیدواروں کی مختلف حکمت عملیوں اور انداز نے ہر قسط میں ناظرین کی دلچسپی برقرار رکھی۔
انہوں نے ناظرین اور ایم ایکس پلیئر از پرائم ویڈیو کی ٹیم کا شکریہ ادا کرتے ہوئے کہا کہ ان کا ادارہ مستقبل میں بھی ایسے تفریحی پروگرام پیش کرنے کا خواہش مند ہے جو ناظرین کی توجہ حاصل کرنے کے ساتھ گفتگو اور دلچسپی کا سبب بنیں۔واضح رہے کہ ریئلٹی شو کے دوسرے سیزن کی میزبانی سابق ہندوستانی کرکٹر وریندر سہواگ نے کی۔
