نئی دہلی: معروف بالی ووڈ اداکار شاہ رخ خان نے میوزک فیسٹیول ’یونیفائیڈ‘ کے انعقاد کا اعلان کیا ہے۔ یہ میلہ 20 مارچ 2027 کو متحدہ عرب امارات (یو اے ای) کے شہر ابوظہبی میں منعقد ہوگا، جس میں 15 سے زائد فنکار اپنے فن کا مظاہرہ کریں گے۔ اس میوزک فیسٹیول میں گلوکار اریجیت سنگھ، سونو نگم اور کرن اوجلا سمیت کئی معروف فنکار شرکت کریں گے۔ شاہ رخ خان نے اس فیسٹیول کو ترتیب دیا ہے، جس کا انعقاد ابوظہبی کے اتحاد لائیو میں ہوگا۔

شاہ رخ خان نے پیر کے روز سوشل میڈیا پلیٹ فارم ’ایکس‘ پر ایک پوسٹ کے ذریعے اس پروگرام کا اعلان کیا۔ انہوں نے اس کے ساتھ پرفارم کرنے والے فنکاروں کی فہرست بھی شیئر کی۔ فیسٹیول کے ٹکٹ ڈسٹرکٹ ایپ پر دستیاب ہوں گے۔ پوسٹ کے ساتھ شیئر کیے گئے پیغام میں کہا گیا، ’’پہلی بار 15 سے زائد فنکار ایک غیر معمولی دن کے لیے ایک ساتھ آ رہے ہیں۔

یونیفائیڈ کا حصہ بننے کا موقع ہاتھ سے نہ جانے دیں۔‘‘ فنکاروں کی فہرست میں شالم علی کھولگڑے، سمرن چودھری اور ڈی جے بوہ! بی کے نام بھی شامل ہیں۔ دریں اثنا، شاہ رخ خان کی آنے والی فلم ’کنگ‘ ہے، جس کی ہدایت کاری سدھارتھ آنند کر رہے ہیں۔ سال 2023 کی فلم ’پٹھان‘ کے بعد شاہ رخ خان اور سدھارتھ آنند دوبارہ ایک ساتھ کام کر رہے ہیں۔ فلم میں دیپیکا پڈوکون اور شاہ رخ خان کی بیٹی سہانا خان بھی نظر آئیں گی۔

فلم ’کنگ‘ کو ریڈ چلیز انٹرٹینمنٹ اور مارفلکس پکچرز کے بینرز تلے تیار کیا جا رہا ہے۔ شاہ رخ خان 2023 میں ریلیز ہونے والی فلم ’ڈنکی‘ کے بعد اب تک کسی فلم میں مرکزی کردار ادا کرتے نظر نہیں آئے ہیں۔ تاہم، 2025 میں ریلیز ہونے والی آریان خان کی نیٹ فلکس سیریز ’دی بیڈز آف بالی ووڈ‘ میں انہوں نے مہمان اداکار کے طور پر شرکت کی تھی۔