نئی دہلی: بالی ووڈ اداکار سلمان خان نے فوجی پس منظر پر مبنی فلم ’ماترو بھومی: مے وار ریسٹ اِن پیس‘ کے ایک گیت کو اپنی آواز دے کر 11 سال بعد پلے بیک سنگنگ میں واپسی کی ہے۔ اپوروا لاکھیا کی ہدایت کاری میں بننے والی اس فلم کے رومانوی گیت میں سلمان خان کے ساتھ چترانگدا سنگھ بھی نظر آ رہی ہیں۔ یہ گیت بدھ کے روز جاری کیا گیا۔

اس گیت کو سلمان خان اور مسکان نے اپنی آواز دی ہے، جب کہ اس کی موسیقی اور بول ساجد خان نے تیار کیے ہیں۔ سلمان خان نے بدھ کی صبح سویرے اپنے سوشل میڈیا اکاؤنٹ پر یہ گیت شیئر کرتے ہوئے لکھا، ’’روانہ ہونے کا وقت صبح 5 بج کر 12 منٹ ہے۔۔۔ پرواز وقت پر ہے۔‘‘ گیت کی ویڈیو میں چترانگدا سنگھ سرخ ساڑی میں رقص کرتی نظر آ رہی ہیں، جب کہ سلمان خان ایک ریکارڈنگ اسٹوڈیو میں اپنے مخصوص انداز میں گانا گاتے دکھائی دے رہے ہیں۔

ویڈیو میں دونوں فنکار ایک ساتھ رقص کرتے ہوئے بھی نظر آتے ہیں۔ سلمان خان کی آنے والی فلم ’ماترو بھومی: مے وار ریسٹ اِن پیس‘ کا نام پہلے ’بیٹل آف گلوان‘ رکھا گیا تھا۔ فلم کی ریلیز کی تاریخ کا ابھی اعلان نہیں کیا گیا ہے۔ سلمان خان نے پہلی بار 1999 میں ریلیز ہونے والی فلم ’ہیلو برادر‘ کے گیت ’چاندی کی ڈال پر سونے کا مور‘ میں اپنی آواز دی تھی۔ اس کے بعد انہوں نے کئی فلمی گیت گائے، جن میں فلم ’وانٹیڈ‘ کا ’موسٹ وانٹیڈ ٹریک‘، فلم ’کک‘ کے گیت ’ہینگ اوور‘، ’تو ہی تو‘ اور ’ہے یہی زندگی‘ شامل ہیں۔ انہوں نے آخری بار 2015 میں ریلیز ہونے والی فلم ’ہیرو‘ کے گیت ’میں ہوں ہیرو تیرا‘ کو اپنی آواز دی تھی۔