ممبئی: فلم ساز اور ہدایت کار کے سی بوکاڈیا نے انکشاف کیا ہے کہ معروف فلمی کہانی نویس سلیم خان نے انہیں فلم ’ہم تمہارے ہیں صنم‘ میں سلمان خان کو شامل کرنے میں اہم کردار ادا کیا تھا۔ شاہ رخ خان اور مادھوری دکشت کے ساتھ سلمان خان کی اداکاری سے سجی یہ فلم آج بھی شائقین کے دلوں میں خاص مقام رکھتی ہے۔
کے سی بوکاڈیا نے فلم کی تیاری سے جڑے کئی دلچسپ واقعات بیان کیے۔ اے این آئی سے گفتگو کرتے ہوئے انہوں نے بتایا کہ سلمان خان نے سلیم خان کے کہنے پر فلم کی کہانی سنے بغیر ہی اس میں کام کرنے کی حامی بھر لی تھی۔
بوکاڈیا کے مطابق سلمان نے فلم کی کہانی نہیں سنی تھی۔ انہوں نے کہا کہ میں نے سلمان کو سلیم صاحب کی وجہ سے فلم میں شامل کیا تھا۔ ہمارے درمیان سلیم صاحب کے ساتھ ایسا ہی تعلق تھا۔ ایک مرتبہ سلیم صاحب محبوب اسٹوڈیو آئے اور مجھ سے کہا کہ مسٹر بوکاڈیا مجھے اپنی قسمت دے دیجیے۔ میں نے انہیں تمل فلم دکھائی تو انہوں نے ہاں کر دی۔ سلمان نے نہ وہ فلم دیکھی تھی اور نہ ہی کہانی سنی تھی۔
فلم ساز نے شاہ رخ خان کو فلم میں شامل کرنے کا واقعہ بھی بیان کیا۔ انہوں نے بتایا کہ اس سے پہلے ان کی شاہ رخ خان سے کبھی ملاقات نہیں ہوئی تھی۔ اس کے باوجود انہوں نے براہ راست ان سے فلم میں کام کرنے کی درخواست کی۔
بوکاڈیا کے مطابق شاہ رخ خان اس وقت فلمستان اسٹوڈیو میں شوٹنگ کر رہے تھے۔ میرے پروڈکشن منیجر نے انہیں بتایا کہ بوکاڈیا آپ سے ملنا چاہتے ہیں۔ وہ اسٹوڈیو سے باہر آئے تو میں نے انہیں تمل فلم کے بارے میں بتایا۔ اگلے دن شاہ رخ خان فلم دیکھنے آئے۔ فلم دیکھنے کے بعد انہوں نے کہا کہ وہ اس طرح کی فلمیں نہیں کرتے لیکن میرے لیے اس میں کام کرنے کو تیار ہیں۔
’ہم تمہارے ہیں صنم‘ تمل فلم ’تھوٹا چننگی‘ کا ہندی روپ تھی۔ اصل تمل فلم کی ہدایت کاری ادھیامان نے کی تھی جبکہ اس کے ہندی روپ کی ہدایت کاری کے ایس ادھیامان نے کی۔ فلم میں ایشوریا رائے نے بھی مختصر کردار ادا کیا تھا۔ یہ فلم 2002 میں ریلیز ہوئی تھی۔
