ساجد خان کی ہدایت کاری میں بننے والی اس فلم میں گووندا کی اہلیہ سنیتا آہوجا بھی ایک اہم کردار میں نظر آئیں گی۔ اس فلم کے ذریعے ایکتا آر کپور ایک بار پھر ہارر فلموں کی دنیا میں واپسی کر رہی ہیں۔ اس پروجیکٹ میں وہ پروڈیوسر امر بوتالا کے ساتھ کام کر رہی ہیں جن کی پروڈکشن میں ’بجرنگی بھائی جان‘ (Bajrangi Bhaijaan) اور ’کیسری‘ (Kesari) اور ’مشن مجنو‘ (Mission Majnu) جیسی فلمیں شامل ہیں۔

فلم کے پہلے پوسٹر میں ایک خوفناک خاتون کردار کی جھلک دکھائی گئی ہے جو ایک پراسرار اور مافوق الفطرت دنیا کی طرف اشارہ کرتی ہے۔ تاہم فلم کی کہانی اور دیگر تفصیلات کو فی الحال خفیہ رکھا گیا ہے۔

ایکتا کپور نے فلم کا موشن پوسٹر جاری کرتے ہوئے لکھا، ’’ہیروئن دل لے جاتی ہے اور ہاررائن دل کھا جاتی ہے۔‘‘

فلم میں یش وردھن آہوجا کے علاوہ نتانشی گوئل اور جیمی لیور کے ساتھ چنکی پانڈے اور برجندر کالا اور سمرت کور رندھاوا بھی اہم کرداروں میں نظر آئیں گے۔ یہ فلم آئندہ سال سینما گھروں میں ریلیز ہوگی۔

اس سے قبل اگست میں خبر رساں ادارے اے این آئی سے گفتگو کرتے ہوئے سنیتا آہوجا نے بتایا تھا کہ وہ فلم میں یش کی والدہ کا کردار ادا کریں گی۔

انہوں نے کہا تھا، ’’میں یش کے ساتھ فلم کر رہی ہوں۔ میں ایکتا کپور سے بہت محبت کرتی ہوں اور ان کی بہت عزت کرتی ہوں۔ انہی کی وجہ سے میں نے نیٹ فلکس کا ایک شو کیا تھا۔ ہمارے درمیان بہت اچھا تعلق ہے اور وہ بھی مجھ سے بہت محبت کرتی ہیں۔ یش کی فلم میں میں اسی کی ماں کا کردار ادا کر رہی ہوں۔ شاید فلمی صنعت میں پہلی بار ایسا ہوگا کہ ماں اور بیٹے کو ایک ساتھ متعارف کرایا جا رہا ہے۔‘‘

’ہیرو کی ہاررائن‘ کی ہدایت کاری ساجد خان کر رہے ہیں جبکہ فلم کی پروڈیوسر شوبھا کپور اور ایکتا آر کپور کے ساتھ امر بوتالا ہیں۔ فلم سے متعلق مزید تفصیلات کا انتظار ہے۔